ദുബായ് > കെനിയയിലെ മൊംബാസയിലേക്ക് അടുത്ത ജനുവരി 17 ന് ഫ്ലൈ ദുബായ് നേരിട്ടുള്ള സർവീസാരംഭിക്കും. ഇതോടെ യുഎഇയിൽ നിന്ന് ദക്ഷിണപൂർവ കെനിയയിലെ ഈ കടലോര നഗരത്തിലക്ക് നേരിട്ട് സർവീസ് നടത്തുന്ന പ്രഥമ എയർലൈൻ എന്ന ഖ്യാതി ഫ്ലൈദുബായ്ക്ക് ലഭിക്കും.
ദുബായ് ഇന്റർനാഷണലിലെ (ഡിഎക്സ് ബി) മൂന്നാം ടെർമിനലിൽ നിന്ന് പുറപ്പെടുന്ന ഫ്ലൈറ്റ് ആഴ്ചയിൽ നാല് തവണയാണ് സർവീസ് നടത്തുക. മൊംബാസയിലേക്ക് സർവീസാരംഭിക്കുന്നതോടെ ആഫ്രിക്കയിലേക്ക് സർവീസ് നടത്തുന്ന കേന്ദ്രങ്ങളുടെ എണ്ണം 11 ആയി വർധിക്കും. 10 രാജ്യങ്ങളിലായാണ് ഈ 11 നഗരങ്ങൾ. നിലവിൽ സർവീസുകളുള്ളത് ആഡിസ് അബാബ, അലക്സാൺഡ്രിയ, ആസ്മാര, ഡാരസ് സലാം, ജിബൗട്ടി, എന്റബെ, ഹർഗീസ, ജൂബ, മൊഗാദിഷ്, സാൻസിബാർ എന്നിവിടങ്ങളിലേക്കാണ്.
പുതിയ സ്ഥലങ്ങളിലേക്ക് സർവീസുകളാരംഭിക്കാനും ദുബായ് ഏവിയേഷൻ ഹബ്ബിനെ ശക്തിപ്പെടുത്താനും ഫ്ലൈ ദുബായ് പ്രതിജ്ഞാബദ്ധമാണെന്ന് ചീഫ് എക്സിക്യൂട്ടീവ് ഓഫീസർ ഘയ്ത് അൽ ഘയ്ത് പറഞ്ഞു. എക്സ്പോ 2020 ന് ശേഷം ആഫ്രിക്കയിൽ നിന്ന് ദുബായിലക്കുള്ള നിക്ഷേപം പടിപടിയായി വർധിച്ചുവരികയാണ്. 26,000ത്തിലേറെ ആഫ്രിക്കൻ കമ്പനികളാണ് ദുബായ് ചേംബറിൽ രജിസ്റ്റർ ചെയ്തിട്ടുള്ളത്. ജനുവരിയിൽ മൊംബാസയിലേക്ക് സർവീസാരംഭിക്കുന്നതോടെ കിഴക്കനാഫ്രിക്കയും യുഎഇ യുമായുള്ള വ്യാപാര ബന്ധവും വിനോദ സഞ്ചാരികളുടെ ഒഴുക്കും കൂടുതൽ ശക്തിപ്പെടും. ആഫ്രിക്കയിൽ വലിയ സാദ്ധ്യതകളാണ് കാണുന്നതെന്നിരിക്കെ കൂടുതൽ വിമാനങ്ങൾ കൂട്ടിച്ചേർക്കുന്ന മുറയ്ക്ക് ആഫ്രിക്കയിലേക്കുളള സർവീസുകളുടെ എണ്ണം വർധിപ്പിക്കാൻ ഫ്ലൈ ദുബായ് ആലോചിക്കുന്നുണ്ടെന്ന് ഘയ്ത് വെളിപ്പെടുത്തി.
കെനിയയിലെ ഏറ്റവും വലിയ രണ്ടാമത്തെ നഗരമായ മൊംബാസ പുരാതന വാസ്തു ശിൽപങ്ങൾക്കും മനോഹരമായ കടൽതീരത്തിനും പേരു കേട്ടതാണ്. കയറ്റിറക്കുമതിയുടെ പ്രധാന കേന്ദ്രമായ നഗരം കെനിയയ്ക്ക് പുറമെ മറ്റ് കിഴക്കനാഫ്രിക്കൻ രാജ്യങ്ങളിലേക്കുമുളള പ്രവേശന കവാടമാണ്.
ആഫ്രിക്ക ഫ്ലൈദുബായിയുടെ പ്രധാന വിപണിയാണെന്ന് കമേഴ്സ്യൽ ഓപ്പറേഷൻ വിഭാഗം സീനിയർ വൈസ് പ്രസിഡന്റ്(യു എ ഇ, ജിസിസി, ആഫ്രിക്ക, ഇന്ത്യൻ ഉപഭൂഖണ്ഡം) സുധീർ ശ്രീധരൻ പറഞ്ഞു. അതിനാൽ അവിടങ്ങളിലേക്കുള്ള സർവീസ് മെച്ചപ്പെടുത്താനുള്ള ഒരു അവസരവും എയർലൈൻ പാഴാക്കാറില്ല. ഇതിനായി എമിറേറ്റ്സിന്റെ സഹകരണവും തേടുന്നു. തനിമയാർന്ന കടൽതീരങ്ങൾ, വന്യജീവി കേന്ദ്രങ്ങൾ, സാംസ്കാരിക വിശേഷങ്ങൾ എന്നിവ ഇഷ്ടപ്പെടുന്ന യുഎഇ, ജിസിസി, യൂറോപ്യൻ രാജ്യങ്ങളിൽ നിന്നുള്ള സഞ്ചാരികൾക്കനുയോജ്യമായ മൊംബാസ ഫ്ലൈ ദുബായിയെ സംബന്ധിച്ചേടത്തോളം മറ്റൊരു മികച്ച ഡെസ്റ്റിനേഷനാണ്. തുടക്കത്തിൽ പ്രതിവാരം നാല് സർവീസുകളാണുണ്ടാവുകയെങ്കിലും ഭാവിയിൽ സർവീസുകളുടെ എണ്ണം വർധിപ്പിക്കാമെന്ന പ്രതീക്ഷയാണുള്ളതെന്ന് സുധീർ ശ്രീധരൻ വ്യക്തമാക്കി.
തിങ്കൾ, ബുധൻ, വെള്ളി, ഞായർ ദിവസങ്ങളിലാണ് ജനുവരി 17 മുതൽ സർവീസുണ്ടാവുക. യാത്രക്കാർക്ക് സൗകര്യപ്രദമാം വിധം ഈ റൂട്ടിൽ എമിറേറ്റ്സുമായി കോഡ്ഷേർ സംവിധാനവുമുണ്ടാവും.
ദുബായിൽ നിന്ന് മൊമ്പാ സയിലേക്കും തിരിച്ചും ടിക്കറ്റ് നിരക്ക് ബിസിനസ് ക്ലാസിന് 4200 യു എ ഇ ദിറവും ഇക്കണോമി ക്ലാസിന് 1600 ദിറവുമാണ്. മൊമ്പാസയിൽ നിന്ന് ദുബായിലേക്കും തിരിച്ചും ബിസിനസ് ക്ലാസ് നിരക്ക് 1500 യു എസ് ഡോളറിലും ഇക്കണോമി ക്ലാസ് നിരക്ക് 500 യു എസ് ഡോളറിലും തുടങ്ങുന്നു.
ബുധനും ഞായറും എഫ് ഇ സെഡ് 1289 ഫ്ലൈറ്റ് രാവിലെ 9.20 ന് ദുബായിൽ നിന്ന് പുറപ്പെട്ട് ഉച്ചക്ക് 1.55 ന് മൊമ്പാസയിലെത്തും. അവിടെ നിന്ന് അന്ന് തന്നെ ഉച്ചക്ക് ശേഷം എഫ് ഇ സെഡ് 1290 ഫ്ലൈറ്റ് 2.55 ന് പുറപ്പെട്ട് രാത്രി 9.25 ന് ദുബായിലിറങ്ങുന്നതാണ്. തിങ്കളും വെള്ളിയും എഫ് ഇസെഡ് 1289 ദുബായിൽ നിന്ന് വൈകീട്ട് 4 മണിക്ക് രാത്രി 8.25 ന് മൊമ്പാ സയിലെത്തും. എഫ് ഇസെഡ് 1290 അന്ന് തന്നെ രാത്രി 9.25 ന് അവിടെ നിന്ന് തിരിച്ച് പുലർച്ചെ 3.55 ന് ദുബായിലെത്തുന്നതാണ്.
പൂർണമായ ടൈംടേബിളി https://www.flydubai.com/en/flying-with-us/timetabl സന്ദർശിക്കുക. flydubai.com, ഫ്ലൈദുബായ് ആപ് എന്നിവയിൽ ടിക്കറ്റുകൾ ബുക്ക് ചെയ്യാവുന്നതാണ്. ദുബായ് ഫോൺ നമ്പർ: (+971) 600 54 44 45. കൂടാതെ ഫ്ലൈദുബായ് ഷോപ്പുകളിൽ നിന്നും ട്രാവൽ പങ്കാളികളിൽ നിന്നും ടിക്കറ്റുകൾ ലഭിക്കും.
