കൊച്ചി
രാജ്യത്ത് ചില്ലറവിൽപ്പനവിലയെ അടിസ്ഥാനമാക്കിയുള്ള വിലക്കയറ്റം (പണപ്പെരുപ്പം) വീണ്ടും കുതിച്ചുയർന്നു. ജൂലൈയിലെ പണപ്പെരുപ്പ നിരക്ക് 7.44 ശതമാനത്തിലേക്ക് ഉയർന്നതായി കേന്ദ്ര സ്ഥിതിവിവരക്കണക്ക് മന്ത്രാലയം തിങ്കളാഴ്ച പുറത്തുവിട്ട കണക്കുകൾ പറയുന്നു. 15 മാസത്തിനിടയിലെ ഏറ്റവും ഉയർന്ന നിരക്കാണിത്. കഴിഞ്ഞമാസം 4.8 ശതമാനമായിരുന്നു. ധാന്യങ്ങൾ, പച്ചക്കറി അടക്കമുള്ള ഭക്ഷ്യവസ്തുക്കളുടെ വിലയിലുണ്ടായ വർധനയാണ് കാരണമായത്. തോത് ആറ് ശതമാനത്തിൽ അധികമാകുന്നത് സമ്പദ്വ്യവസ്ഥയെ ഗുരുതരമായി ബാധിക്കും എന്ന റിസർവ് ബാങ്ക് നിരീക്ഷണം വന്നതിന് തൊട്ടുപുറകെയാണ് ജനജീവിതം ദുസ്സഹമാക്കിയ കണക്കുകൾ പുറത്തുവന്നത്.
ഭക്ഷ്യോൽപ്പന്ന വിലസൂചിക ജൂണിലെ 4.49 ശതമാനത്തിൽനിന്ന് 11.51 ശതമാനമായി. രാജ്യത്ത് പച്ചക്കറി വില 37.3 ശതമാനം ഉയർന്നപ്പോൾ ധാന്യങ്ങൾക്കും പയർവർഗങ്ങൾക്കും 13 ശതമാനത്തിലധികം വില കൂടുതൽ നൽകേണ്ടിവന്നുവെന്നും സർക്കാർ കണക്കുകൾ പറയുന്നു. ആഗസ്തിലും വിലക്കയറ്റം ഉയരുമെന്നാണ് കഴിഞ്ഞദിവസം പണനയ പ്രഖ്യാപനത്തിൽ റിസർവ് ബാങ്ക് ഗവർണർ സൂചിപ്പിച്ചത്.
പിടിച്ചുനിർത്തി
കേരളം
അതേസമയം വിലക്കയറ്റത്തോത് ദേശീയശരാശരിയിലും താഴെ 6.43 ശതമാനത്തിൽ പിടിച്ചുനിർത്താൻ കേരളത്തിനു കഴിഞ്ഞിട്ടുണ്ടെന്ന് കണക്കുകൾ വ്യക്തമാക്കുന്നു. കുറവ് ഒരു ശതമാനം. ദക്ഷിണേന്ത്യൻ സംസ്ഥാനങ്ങളിൽ ഏറ്റവും വിലക്കുറവും കേരളത്തിലാണ്. ബിജെപി ഭരിക്കുന്ന ഉത്തർപ്രദേശിൽ 8.13 ശതമാനവും കോൺഗ്രസ് ഭരിക്കുന്ന രാജസ്ഥാനിൽ 9.66 ശതമാനവുമാണ് വിലക്കയറ്റം. മണിപ്പൂർ ഒഴികെ പശ്ചിമബംഗാളടക്കം വടക്കുകിഴക്കൻ സംസ്ഥാനങ്ങൾക്കും വിലക്കയറ്റം കുറച്ചുകൊണ്ടുവരാനായി.
ഡോളറുമായുള്ള വിനിമയമൂല്യത്തിൽ ഇന്ത്യൻ രൂപയുടെ മൂല്യം കുത്തനെ ഇടിഞ്ഞു. തിങ്കൾ ഇന്റർ ബാങ്ക് ഫോറെക്സ് വിപണിയിൽ അമേരിക്കൻ ഡോളറിനെതിരെ 83.02 നിരക്കിലാണ് രൂപയുടെ വ്യാപാരം ആരംഭിച്ചത്. മുൻദിവസത്തെ അവസാന നിരക്കായ 82.84ൽനിന്ന് 18 പൈസയാണ് രൂപയ്ക്ക് നഷ്ടമായത്. 2022 ഒക്ടോബറിനുശേഷമുള്ള ഏറ്റവും വലിയ തകർച്ചയാണിത്. ഈ വർഷാരംഭത്തിലെ നിരക്കുമായി ഒത്തുനോക്കുമ്പോൾ 22 പൈസയാണ് രൂപയുടെ മൂല്യത്തിൽ നഷ്ടമായത്.
ഡോളർ ശക്തിപ്പെട്ടതും വിദേശനിക്ഷേപകർ വൻതോതിൽ നിക്ഷേപം ഇന്ത്യയിൽനിന്ന് പിൻവലിക്കുന്നതും ഇന്ത്യൻ ഓഹരിവിപണി ദുർബലമായതുമാണ് രൂപയ്ക്ക് തിരിച്ചടിയായത്. രൂപയുടെ മൂല്യം ഇടിയുന്നത് പണപ്പെരുപ്പം വീണ്ടും ഉയരാനിടയാക്കും. കഴിഞ്ഞവർഷം രൂപയുടെ മൂല്യം പത്തുശതമാനത്തിലേറെ ഇടിവ് നേരിട്ടിരുന്നു.
