അബുദാബി > ശക്തി തിയറ്റേഴ്സ് അബുദാബിയുടെ ആഭിമുഖ്യത്തിൽ ഏകദിന നാടകശില്പശാല സംഘടിപ്പിച്ചു. കേരള സംഗീത നാടക അക്കാദമി അവാർഡ് ജേതാവ് കോട്ടക്കൽ മുരളിയും നാടക പ്രവർത്തകൻ ശ്രീജിത്ത് കാഞ്ഞിലശ്ശേരയും നേതൃത്വം കൊടുത്ത ശില്പശാല കേരള സോഷ്യൽ സെന്റർ പ്രസിഡന്റ് എ കെ ബീരാൻകുട്ടി “മാരിവില്ലിൻ തേൻ മലരേ…” എന്ന് തുടങ്ങുന്ന ഗാനം ആലപിച്ച് ഉദ്ഘാടനം ചെയ്തു.
ജെ സി ഡാനിയേൽ പുരസ്കാര ജേതാവ് ടി വി ചന്ദ്രനെ അനുമോദിച്ചുകൊണ്ട് തുടക്കം കുറിച്ച ക്യാമ്പിൽ അൻപതിലേറെ പേർ പങ്കെടുത്തു. മുൻകൂട്ടി രജിസ്റ്റർ ചെയ്താണ് ശില്പശാലയിലേക്കുള്ള പ്രവേശനം നിയന്ത്രിച്ചത്.
ശ്രീജിത്ത് കാഞ്ഞിലശ്ശേരി ചൊല്ലിക്കൊടുത്ത “നിങ്ങള് നിങ്ങളെ മാത്രം ഇഷ്ടപ്പെടല്ലപ്പാ…” എന്ന് തുടങ്ങുന്ന ഗാനം പാടിയാണ് ക്യാമ്പ് അവസാനിപ്പിച്ചത്. ശില്പശാലയുടെ സമാപന ചടങ്ങിൽ ശക്തി ജനറൽ സെക്രട്ടറി സഫറുള്ള പാലപ്പെട്ടി, കലാവിഭാഗം സെക്രട്ടറി അൻവർ ബാബു, ട്രഷറർ അഡ്വ. സലിം ചോലമുഖത്ത്, വൈസ് പ്രസിഡന്റ് നാഷ പത്തനാപുരം എന്നിവർ സംസാരിച്ചു.
