ന്യൂഡൽഹി > ഇന്ത്യയിലെ ബിബിസി ഓഫീസുകളിൽ ആദായ നികുതി വകുപ്പ് നടത്തുന്ന പരിശോധനയെ വിമർശിച്ച് എഡിറ്റേഴ്സ് ഗിൽഡ്. കേന്ദ്ര സർക്കാരിൻ്റെ നയങ്ങളെ വിമർശിക്കുന്ന മാധ്യമസ്ഥാപനങ്ങളെ ഏജൻസികളെ ഉപയോഗിച്ച് ഭയപ്പെടുത്തുന്ന പ്രവണതയുടെ തുടർച്ചയാണ് ബിബിസി ഓഫീസുകളിലെ പരിശോധനകളെന്ന് എഡിറ്റേഴ്സ് ഗിൽപ്രസ്താവനയിലൂടെ പറഞ്ഞു.
മാധ്യമ സ്ഥാപനങ്ങൾക്കെതിരെ സർക്കാർ ഏജൻസികളെ ഉപയോഗിക്കുന്നത് വേദനാജനകമാണ്. ഈ പ്രവണത ഭരണഘടനാപരമായ ജനാധിപത്യത്തെ തുരങ്കം വെക്കുകയാണ്. ഭരണഘടനയെയും ജനാധിപത്യത്തെയും അവഹേളിക്കുന്നതാണ് ഇത്തരത്തിലുള്ള പ്രവണത. മാധ്യമപ്രവർത്തകരുടെയും സംഘടനകളുടെയും അവകാശങ്ങൾ സംരക്ഷിക്കാനുള്ള നടപടികൾ ഉണ്ടാകണം. ഇതിനായി അതീവ ജാഗ്രതയും സംവേദനക്ഷമതയും എല്ലാ അന്വേഷണങ്ങളിലും ഉണ്ടാകണം.
സർക്കാർ നയങ്ങളെയോ ഭരണസ്ഥാപനങ്ങളെയോ വിമർശിക്കുന്ന മാധ്യമസ്ഥാപനങ്ങളെ ഭീഷണിപ്പെടുത്തുന്നതിന് സർക്കാർ ഏജൻസികളെ ഉപയോഗിക്കുന്ന പ്രവണതയുടെ തുടര്ച്ചയാണ് ബിബിസി ഓഫീസുകളിൽ നടന്ന പരിശോധനയെന്ന് എഡിറ്റേഴ്സ് ഗില്ഡ് അഭിപ്രായപ്പെട്ടു. കേന്ദ്ര ഏജൻസികളുടെ സമാന അന്വേഷണങ്ങൾ മാധ്യമ സ്ഥാപനങ്ങൾക്ക് നേരെ മുൻപും ഉണ്ടായിട്ടുള്ളതായി എഡിറ്റേഴ്സ് ഗിൽഡ് വ്യക്തമാക്കി. 2021ൽ ന്യൂസ് ക്ലിക്ക്, ന്യൂസ് ലോൺഡ്രി, ദൈനിക് ഭാസ്കർ എന്നീ മാധ്യമസ്ഥാപനങ്ങളിൽ നടത്തിയ റെയ്ഡുകൾ ഇതിന് ഉദ്ദാഹരണമാണെന്നും എഡിറ്റേഴ്സ് ഗിൽഡ് ചൂണ്ടിക്കാട്ടി.
