മുകേഷ് അംബാനിയുടെയും നിത അംബാനിയുടെയും മകൻ അനന്ത് അംബാനിയുടെ വിവാഹ നിശ്ചയം അംബാനിയുടെ മുംബൈയിലെ വസതിയായ ആന്റീലിയിൽ പരമ്പരാഗത രീതിയിൽ കെങ്കേമമായി നടന്നു. രാജസ്ഥാനിൽ നിന്നുള്ള വ്യവസായിയും എൻകോർ ഹെൽത്ത്കെയർ ഗ്രൂപ്പ് ഉടമയുമായ വീരേൻ മർച്ചന്റിന്റെയും ഷൈല മർച്ചന്റിന്റെയും മകളായ രാധിക മെർച്ചൻറാണ് വധു. അത്യാഡംബരവും സർപ്രൈസുകളും നിറഞ്ഞ ചടങ്ങാണ് അംബാനി കുടുംബം വിശിഷ്ടാതിഥികൾക്കായി ഒരുക്കിയത്. വിവാഹ നിശ്ചയത്തിൻറെ ചിത്രങ്ങളും വീഡിയോയും ഇതിനോടകം സോഷ്യൽ മീഡിയയിൽ വൈറലായി.
ഗുജറാത്തി ഹിന്ദു പാരമ്പര്യം അനുസരിച്ചുള്ള ഗോൽ ധന, ചുനരി വിധി എന്നീ ചടങ്ങുകൾ നടന്നു. അനന്തിന്റെ സഹോദരി ഇഷയുടെ നേതൃത്വത്തിൽ അംബാനി കുടുംബത്തിലെ അംഗങ്ങൾ രാധികയെയും കുടുംബത്തെയും വൈകുന്നേരത്തെ ചടങ്ങുകളിലേക്ക് ക്ഷണിക്കാൻ മർച്ചന്റ് വസതിയിലേക്ക് പോയതോടെയാണ് സായാഹ്ന ആഘോഷങ്ങൾക്ക് തുടക്കമായത്.
അനന്തിന്റെ സഹോദരി ഇഷയുടെ നേതൃത്വത്തിലുള്ള സംഘം വധൂഗൃഹത്തിലെത്തി രാധികയെയും കുടുംബത്തെയും ക്ഷണിച്ചു കൊണ്ടു വന്നു. തുടർന്ന് രാധികയും അനന്തും കുടുംബക്ഷേത്രത്തിലെത്തി അനുഗ്രഹം തേടി. ഗോൾഡൻ ലെഹങ്കയായിരുന്നു രാധികയുടെ വേഷം. റോയൽ ബ്ലൂ നിറത്തിലുള്ള ഔട്ട്ഫിറ്റാണ് അനന്ത് ധരിച്ചത്. നിശ്ചയത്തിനു മുന്നോടിയായി വേദിയിൽ ഗണേശ പൂജ നടത്തി. തുടർന്ന് പത്രിക വായിക്കുകയും മോതിരങ്ങൾ അണിയിക്കുകയും ചെയ്തു.
ന്യൂയോർക്ക് സർവകലാശാലയിൽനിന്ന് ബിരുദമെടുത്ത രാധിക മർച്ചന്റ് എൻകോർ ഹെൽത്ത്കെയർ ലിമിറ്റഡിൽ ഡയറക്ടറാണ്. യുഎസ്എയിലെ ബ്രൗൺ യൂണിവേഴ്സിറ്റിയിൽ പഠനം പൂർത്തിയാക്കിയ ആനന്ദ് നിലവിൽ റിലയൻസ് ഇൻഡസ്ട്രീസ് ലിമിറ്റഡിന്റെ ഡയറക്ടറാണ്. ജിയോ പ്ലാറ്റ്ഫോമുകളുടെയും റിലയൻസ് റീട്ടെയ്ൽ വെഞ്ചേഴ്സിന്റെയും ബോർഡ് അംഗവുമായിരുന്നു ആനന്ദ്.
