ശ്രീനഗർ
ഭീകരാക്രമണത്തിൽ ജമ്മു കശ്മീരിൽ മൂന്ന് പ്രദേശവാസികൾ കൊല്ലപ്പെട്ടു, 10 പേർക്ക് പരിക്ക്. പുതുവർഷ ദിനത്തിൽ വൈകിട്ട് രജൗരി ജില്ലയിലെ ധാൻഗ്രി ഗ്രാമത്തിലാണ് ആക്രമണമുണ്ടായത്. മൂന്ന് വീടിനുനേരെയാണ് തോക്കുധാരികളായ രണ്ടുപേർ വെടിയുതിർത്തതെന്ന് എഡിജിപി മുകേഷ് സിങ് പറഞ്ഞു. വെടിവച്ചവർ പിന്നീട് രക്ഷപ്പെട്ടതായും അദ്ദേഹം പറഞ്ഞു. ഗുരുതരമായി പരിക്കേറ്റവരെ രജൗരി മെഡിക്കൽ കോളേജ് ആശുപത്രിയിലേക്ക് മാറ്റി. ആശുപത്രിക്ക് പുറത്ത് സംഘർഷാവസ്ഥയുണ്ട്.
ഡിസംബർ മൂന്നാംവാരത്തിൽ രജൗരിയിൽ സൈനിക ക്യാമ്പിനോടു ചേർന്ന് രണ്ട് പ്രദേശവാസികൾ വെടിയേറ്റ് കൊല്ലപ്പെട്ടിരുന്നു. അതിനിടെ മറ്റൊരു സംഭവത്തിൽ കശ്മീരിൽ സിആർപിഎഫ് വാഹനത്തിനുനേരെ ഗ്രനേഡ് ആക്രമണമുണ്ടായി. ഒരു പ്രദേശവാസിക്ക് പരിക്കേറ്റു.
