ഡെറാഡൂൺ> പതഞ്ജലിയുടെ അഞ്ച് മരുന്നിന്റെ നിർമാണം നിർത്താൻ ആവശ്യപ്പെട്ട് ഉത്തരാഖണ്ഡ്. ആയുർവേദ– യുനാനി ലൈസൻസിങ് അതോറിറ്റി. മധുഗ്രിറ്റ്, ഐഗ്രിറ്റ്, തൈഗ്രിറ്റ്, ബിപിഗ്രിറ്റ്, ലിപിഡോം എന്നിവയുടെ ഉൽപ്പാദനം നിർത്താനാണ് പതഞ്ജലിയുടെ ദിവ്യ ഫാർമസിയോട് ആവശ്യപ്പെട്ടത്. രക്തസമ്മർദം, പ്രമേഹം, ഗോയിറ്റർ, ഗ്ലോക്കോമ, ഉയർന്ന കൊളസ്ട്രോൾ എന്നിവയുടെ ചികിത്സയ്ക്കായി കമ്പനി പുറത്തിറക്കിയതാണ് ഈ മരുന്നുകൾ.
ഡ്രഗ്സ് ആൻഡ് കോസ്മെറ്റിക് ആക്ട് 1940, റൂൾസ് 1945 തുടങ്ങിയ നിയമങ്ങൾ തുടർച്ചയായി ലംഘിച്ചതിനാണ് നടപടി. തെറ്റിദ്ധരിപ്പിക്കുന്ന പരസ്യങ്ങളും നിർത്തണമെന്നും ഉത്തരവിട്ടിട്ടുണ്ട്. അംഗീകാരം ലഭിച്ച പരസ്യങ്ങൾ കമ്പനി പ്രസിദ്ധീകരിക്കണമെന്നും അല്ലെങ്കിൽ ലൈസൻസ് റദ്ദാക്കുമെന്നും അതോറിറ്റി അറിയിച്ചു. ഇതുസംബന്ധിച്ച് എട്ടിന് നോട്ടീസ് അയച്ചിട്ടുണ്ടെങ്കിലും പതഞ്ജലി അധികൃതർ മറുപടി നൽകിയിട്ടില്ല.
