റിയാദ്> ഫിഫ ഫുട്ബോൾ ലോകകപ്പിനോടനുബന്ധിച്ചു നവംബർ 20 മുതൽ റിയാദ് നിന്നും ജിദ്ദ നിന്നും ദോഹയിലേക്ക് ദിവസേന ഫ്ലൈറ്റുകൾ ആരംഭിക്കുമെന്ന് ഫ്ലൈനാസ് അറിയിച്ചു. നവംബർ 20 ന് റിയാദിലെ കിംഗ് ഖാലിദ് ഇന്റർനാഷണൽ എയർപോർട്ടിൽ നിന്നും ജിദ്ദയിലെ കിംഗ് അബ്ദുൽ അസീസ് ഇന്റർനാഷണൽ എയർപോർട്ടിൽ നിന്നും ആഴ്ചയിൽ 30 സർവീസുകൾ നടത്തുമെന്നാണ് സൗദി എയർ കാരിയറും മിഡിൽ ഈസ്റ്റിലെ മുൻനിര എയർലൈനും ആയ ഫ്ലൈനാസ് അറിയിച്ചത്.
കൂടാതെ ലോകകപ്പിനെത്തുന്ന ആരാധകരിൽ നിന്നും ആഗ്രഹിക്കുന്നവർക്ക് സൗദി സന്ദർശിക്കാനുള്ള അവസരവും ഒരുക്കുമെന്നും കമ്പനി അറിയിച്ചു. “ഞങ്ങൾ ലോകത്തെ രാജ്യവുമായി ബന്ധിപ്പിക്കുന്നു” എന്ന മുദ്രാവാക്യത്തിന് കീഴിൽ ഈ വർഷത്തിന്റെ തുടക്കത്തിൽ ആരംഭിച്ച ഫ്ലൈനാസിന്റെ വിപുലീകരണ തന്ത്രത്തിന്റെ വെളിച്ചത്തിലാണ് ദോഹയിലേക്കുള്ള പുതിയ ഫ്ലൈറ്റുകൾ ആരംഭിക്കുന്നത്.
2030 ഓടെ 330 ദശലക്ഷം യാത്രക്കാരിൽ എത്തിച്ചേരാനും രാജ്യവുമായി ബന്ധിപ്പിച്ചിട്ടുള്ള അന്താരാഷ്ട്ര ലക്ഷ്യസ്ഥാനങ്ങളുടെ എണ്ണം 250 ലധികം ലക്ഷ്യസ്ഥാനങ്ങളിലേക്ക് വർദ്ധിപ്പിക്കാനുമുള്ള സിവിൽ ഏവിയേഷൻ തന്ത്രത്തിന്റ ഭാഗം കൂടിയാണിത്. ഖത്തറിൽ നടക്കുന്ന 2022 ഫിഫ ലോകകപ്പിന്റെ ആരാധകർക്കായി “ഹയ” കാർഡ് കൈവശമുള്ള എല്ലാവരെയും കിംഗ്ഡം സ്വാഗതം ചെയ്യുമെന്ന് സൗദി വിദേശകാര്യ മന്ത്രാലയം നേരത്തെ അറിയിച്ചിരുന്നു.
ഹയ കാർഡ് കൈവശമുള്ളവർക്ക് രാജ്യത്തിലേക്കുള്ള പ്രവേശന വിസയ്ക്കുള്ള അഭ്യർത്ഥന സ്വീകരിച്ചു വിസ അനുവദിക്കുമെന്ന് മന്ത്രാലയം വിശദീകരിച്ചു. വിസയുടെ സാധുതാ കാലയളവിൽ നിരവധി തവണ രാജ്യത്ത് പ്രവേശിക്കുന്നതും പുറത്തുകടക്കുന്നതും ഉൾപ്പെടുന്ന 60 ദിവസത്തേക്ക് ഈ കാർഡിന്റെ കാലാവധി എന്നും മന്ത്രാലയം അറിയിച്ചു.
