ന്യൂഡല്ഹി> കോവിഡ് മഹാമാരിക്കെതിരായ പോരാട്ടത്തിൽ വാക്സിനേഷൻ പരിപാടിയിലൂടെ രാജ്യം കരുത്ത് തെളിയിച്ചെന്ന് രാഷ്ട്രപതി രാംനാഥ് കോവിന്ദ്. രാജ്യത്ത് 150 കോടി വാക്സിൻ ഡോസുകൾ നല്കാൻ കഴിഞ്ഞു. 70 ശതമാനം പേർ രണ്ടു ഡോസ് വാക്സിൻ സ്വീകരിച്ചു. കൗമാരക്കാർക്കുള്ള വാക്സിനേഷൻ, കരുതൽ ഡോസ് എന്നിവ വലിയ നേട്ടമാണെന്നും അദ്ദേഹം പറഞ്ഞു.
പാര്ലമെന്റിന്റെ ബജറ്റ് സമ്മേളനത്തിന് മുന്നോടിയായി ഇരുസഭകളുടെയും സംയുക്തസമ്മേളനത്തെ രാഷ്ട്രപതി രാംനാഥ് കോവിന്ദ് അഭിസംബോധന ചെയ്തു സംസാരിക്കുകയായിരുന്നു അദ്ദേഹം. സ്വാതന്ത്ര്യത്തിന്റെ 75-ാം വാര്ഷികത്തില് സ്വാതന്ത്ര്യസമര സേനാനികളെയും രാജ്യത്തിന്റെ വികസനത്തിനായി സംഭാവനകള് നല്കിയ മഹത് വ്യക്തിത്വങ്ങളെയും രാഷ്ട്രപതി തന്റെ പ്രസംഗത്തില് അനുസ്മരിച്ചു. ബി ആർ അംബേദ്കറുടെ തുല്യതാ നയമാണ് സർക്കാർ പിന്തുടരുന്നതെന്നും രാഷ്ട്രപതി പറഞ്ഞു.
കോവിഡ് മഹാമാരി കാലത്ത് രാജ്യത്ത് നിരവധിപേർക്ക് ജീവൻ നഷ്ടപ്പെട്ടു. ഈ സാഹചര്യത്തിലും കേന്ദ്ര, സംസ്ഥാന സര്ക്കാരുകളും ഡോക്ടര്മാര്, നേഴ്സുമാര്, ശാസ്ത്രജ്ഞര്, ആരോഗ്യപ്രവര്ത്തകര് തുടങ്ങിയവര് ഒരുമയോടെ പ്രവര്ത്തിച്ചു. അവര്ക്കെല്ലാവര്ക്കും ഈ അവസരത്തില് നന്ദി അറിയിക്കുന്നെന്നും രാഷ്ട്രപതി പറഞ്ഞു.
