പ്രായത്തിനും, ലിംഗത്തിനും, സ്ഥലത്തിനും, താൽപര്യങ്ങൾക്കും അനുസരിച്ചുള്ള പരസ്യ വിതരണമാണ് ഓൺലൈൻ പരസ്യ വിതരണ സ്ഥാപനങ്ങൾ നടത്തുന്നത്. പരസ്യം യഥാർത്ഥ ഉപഭോക്താവിലേക്ക് എത്തിക്കാൻ ഇതുവഴി സാധിക്കും. മുൻനിര ഓൺലൈൻ പരസ്യ വിതരണ സ്ഥാപനമായ ഗൂഗിളും ഈ രീതി തന്നെയാണ് പിന്തുടരുന്നത്. എന്നാൽ ഇനി 18 വയസിൽ താഴെയുള്ളവരെ ലക്ഷ്യമിട്ടുള്ള പരസ്യങ്ങൾ നൽകേണ്ടതില്ലെന്ന നിലപാടിലാണ് കമ്പനി.
ഇതിന്റെ ഭാഗമായി 18 വയസിൽ താഴെ പ്രായമുള്ള ഇന്റർനെറ്റ് ഉപഭോക്താക്കളിലേക്ക് ലിംഗത്തിന്റേയും താൽപര്യങ്ങളുടേയും സ്ഥലങ്ങളുടേയും അടിസ്ഥാനത്തിൽ പരസ്യവിതരണം നടത്തുന്നത് ഗൂഗിൾ അവസാനിപ്പിക്കാനുള്ള ശ്രമത്തിലാണ്. ഒരു പ്രസ്താവനയിലാണ് കമ്പനി ഇക്കാര്യം അറിയിച്ചത്.
18 വയസിൽ താഴെയുള്ള കൗമാരക്കാർക്കും കുട്ടികൾക്കും ഓൺലൈൻ സുരക്ഷിതത്വം ഉറപ്പുവരുത്തുന്നതിനുള്ള നടപടി ക്രമങ്ങളുടെ ഭാഗമായാണ് ഈ നീക്കം.
ഉപഭോക്താക്കളുടെ സ്വകാര്യത ലംഘിക്കാതെ ഉപഭോക്തൃ വിവരങ്ങൾ വെബ്സൈറ്റിന് ലഭ്യമാക്കുന്നതിനുള്ള ഗൂഗിൾ ക്രോമിലെ പ്രൈവസി സാൻഡ്ബോക്സ് എന്ന സംവിധാനവും കമ്പനി സുരക്ഷക്കായി പ്രയോജനപ്പെടുത്തുന്നുണ്ട്.
ഒരു പരസ്യം എന്തുകൊണ്ടാണ് തന്നെ കാണിക്കുന്നത് എന്ന് ഉപഭോക്താവിന് അറിയാൻ സാധിക്കുന്ന About this ad മെനുവും പരസ്യ വിതരണത്തിലെ സുതാര്യത ഉറപ്പുവരുത്തുന്നതിന് വേണ്ടിയുള്ളതാണ്.
Content Highlights: Google to soon block ad targeting for people under 18
