സാൻഫ്രാൻസിസ്കോ: 5ജി കണക്റ്റിവിറ്റിയോടു കൂടിയ ആപ്പിൾ ഐ ഫോൺ എസ്ഇ ഈ വർഷം മാർച്ചിലോ ഏപ്രിലിലോ പുറത്തിറക്കിയേക്കും. ഈ വർഷത്തെ ആപ്പിളിന്റെ ആദ്യ അവതര പരിപാടി മാർച്ചിലോ ഏപ്രിലിലോ ആയിരിക്കുമെന്ന് മാർക്ക് ഗുർമാന്റെ പവർ ഓൺ ന്യൂസ് ലെറ്ററിനെ ഉദ്ധരിച്ച് ഐ.എ.എൻ.എസ്. റിപ്പോർട്ട് ചെയ്‌യുന്നു. മുൻ പരിപാടികളെ പോലെ ഇതും വിർച്വൽ ഇവന്റായാവും നടത്തുക.
2022-ലെ ഐ ഫോൺ എസ്ഇയിൽ മൂന്ന് ജിബി സ്റ്റോറേജ് ഉണ്ടാവുമെന്നാണ് റിപ്പോർട്ടുകൾ. 2023-ൽ പുറത്തിറക്കാൻ പോവുന്ന ഐഫോൺ എസ്ഇയിൽ വലിയ ഡിസ്പ്ലേ, 4 ജിബി മെമ്മറി ഉൾപ്പടെയുള്ള മാറ്റങ്ങളുണ്ടാകുമെന്നും റിപ്പോർട്ടുകൾ സൂചിപ്പിക്കുന്നു.
5ജി കണക്റ്റിവിറ്റിയോടുകൂടിയ 4.7 ഇഞ്ച് വലിപ്പമുള്ള ഐഫോൺ എസ്ഇ 2022 പുറത്തിറക്കാൻ ആപ്പിൾ തയ്‌യാറെടുക്കുന്നതായി നേരത്തെ ഡിസ്പ്ലേ അനലിസ്റ്റായ റോസ് യങ് പറഞ്ഞിരുന്നു.
അതേസമയം, വലിയ ഡിസ്പ്ലേയുള്ള ഐ ഫോൺ എസ്ഇ 2023-ൽ പുറത്തിറക്കില്ലെന്നും 2024-ലായിരിക്കും അവതരിപ്പിക്കുക എന്നുമാണ് യങ് പറഞ്ഞത്. എന്നാൽ വലിയ സ്ക്രീനുള്ള ഐഫോൺ എസ്ഇ 2023-ൽ തന്നെ പുറത്തിറക്കുമെന്നാണ് തനിക്ക് തോന്നുന്നത് എന്നാണ് ആപ്പിൾ അനലിസ്റ്റായ മിങ് ചി കുവോ പറയുന്നത്.
നിലവിലുള്ള ഐഫോൺ എസ്ഇ മോഡലിന് സമാനമായിരിക്കും ഈ വർഷം പുറത്തിറക്കാൻ പോവുന്ന ഐഫോൺ എസ്ഇ എന്നും. 4.7 ഇഞ്ച് ഡിസ്പ്ലേ ആയിരിക്കും ഇതിന്. 5ജി കണക്റ്റിവിറ്റിയാണ് അധികമായി ചേർക്കുക. പുതിയ ഫോണിൽ എ14 ചിപ്പ് ആണോ അതോ എ15 ചിപ്പ് ആണോ ഉണ്ടാവുക എന്ന് വ്യക്തമല്ല.
Content Highlights: Apple expected to launch new iPhone in March 2022
