ആമസോൺ ക്ലൗഡ് സേവനത്തിൽ തടസം നേരിട്ടതിനെ തുടർന്ന് നിരവധി വെബ്സൈറ്റുകളുടേയും നെറ്റ്ഫ്ളിക്സ്, ഡിസ്നി പ്ലസ്, റോബിൻഹുഡ് ഉൾപ്പടെയുള്ള പ്ലാറ്റ്ഫോമുകളുടേയും നിരവധി ആപ്പുകളുടേയും പ്രവർത്തനം താൽകാലികമായി തടസപ്പെട്ടു. ക്രിസ്തുമസിന് മുന്നോടിയായുള്ള വിൽപന നടക്കുന്നതിനിടെ ആമസോൺ.കോം ഇ കൊമേഴ്സ് വെബ്സൈറ്റിന്റെയും പ്രവർത്തനം തടസം നേരിട്ടു.
എന്നാൽ പല സേവനങ്ങളുടെയും പ്രവർത്തനം പുനഃസ്ഥാപിച്ചുവെന്നും മറ്റ് സേവനങ്ങളെല്ലാം പുനഃസ്ഥാപിക്കുന്നതിനുള്ള കഠിന ശ്രമത്തിലാണെന്നും ആമസോൺ അറിയിച്ചു.
ആമസോൺ റിങ് സെക്യൂരിറ്റി ക്യാമറകൾ, മൊബൈൽ ബാങ്കിങ് ആപ്പ് ആയ ചൈം (Chime), വാക്വം ക്ലീനർ റോബോട്ട് നിർമാതാക്കളായ ഐറോബോട്ട് എന്നിവയെല്ലാം ആമസോൺ വെബ് സർവീസസ് ആണ് ഉപയോഗിച്ചിരുന്നത്.
ട്രേഡിങ് ആപ്ലിക്കേഷനായ റോബിൻഹുഡ്, വാൾട് ഡിസ്നിയുടെ സ്ട്രീമിങ് സേവനമായ ഡിസ്നി പ്ലസ്, നെറ്റ്ഫ്ളിക്സ് എന്നിവയിലും തടസം നേരിട്ടതായി ഡൗൺ ഡിറ്റക്‍ടർ.കോം വ്യക്തമാക്കുന്നു.
നെറ്റ്ഫ്ളിക്സിന്റെ ഭൂരിഭാഗം സേവനങ്ങളും ആമസോൺ വെബ്സർവീസസിന്റെ പിൻബലത്തിലാണ് പ്രവർത്തിക്കുന്നത്. സേവനത്തിൽ തടസം നേരിട്ടതോടെ നെറ്റ്ഫ്ളിക്സിന്റെ 26 ശതമാനം ട്രാഫിക് നഷ്ടപ്പെട്ടുവെന്ന് അനലറ്റിക്സ് സ്ഥാപനമായ കെന്റികിലെ ഇന്റർനെറ്റ് അനാലിസിസ് മേധാവി ഡഗ് മഡോറി പറഞ്ഞു.
ആപ്ലിക്കേഷൻ ഇന്റർഫെയ്സ് പ്രോഗ്രാമുമായും നെറ്റ്വർക്ക് ഉപകരണങ്ങളുമായും ബന്ധപ്പെട്ടുള്ള തകരാറാണ് തടസം നേരിടുന്നതിനിടയാക്കിയത് എന്ന് ആമസോൺ പറഞ്ഞു.
ആമസോൺ തകരാറുമായി ബന്ധപ്പെട്ട് 24000 സംഭവങ്ങൾ ഡൗൺ ഡിറ്റക്‍ടർ വെബ്സൈറ്റിൽ കാണിച്ചു. ചൊവ്വാഴ്ച രാവിലെ 10.40 മുതലാണ് ആളുകൾ തകരാർ റിപ്പോർട്ട് ചെയ്ത് തുടങ്ങിയത്.
കഴിഞ്ഞ 12 മാസത്തിനിടയ്‍ക്ക് 27 തവണ ആമസോൺ വെബ്സർവീസസിൽ തടസം നേരിട്ടുവെന്ന് വെബ് ടൂൾ റിവ്യൂവിങ് വെബ്സൈറ്റായ ടൂൾടെസ്റ്റർ പറഞ്ഞു.
Content Highlights: Amazon cloud outage hits major websites, streaming apps
