ന്യൂഡൽഹി > കേന്ദ്ര സർക്കാരിനെതിരെ രൂക്ഷ വിമർശനവുമായി സുപ്രീംകോടതി. ട്രിബ്യൂണല് പരിഷ്കരണ നിയമം ചോദ്യംചെയ്ത് നല്കിയ ഹര്ജികള് പരിഗണിക്കവെയാണ് സുപ്രീംകോടതിയുടെ രൂക്ഷവിമർശനം. കോടതിയുടെ ക്ഷമ പരീക്ഷിക്കരുത്. സുപ്രീം കോടതി വിധികളെ നിയമനിർമാണത്തിലൂടെ കേന്ദ്ര സർക്കാർ മറികടക്കാൻ ശ്രമിക്കുന്നത് എന്ത് നടപടിയാണെന്ന് കോടതി ആരാഞ്ഞു.
മുമ്പ് കേസ് പരിഗണിച്ചപ്പോള് ട്രിബ്യൂണലുകളിലെ ചെയര്മാന്റെയും അംഗങ്ങളുടെയും ഒഴിവുകള് ഉടന് നികത്തുമെന്ന് സര്ക്കാര് കോടതിക്ക് ഉറപ്പ് നല്കിയിരുന്നു. കോടതി ഇന്ന് കേസ് പരിഗണിച്ചപ്പോൾ കേന്ദ്ര അഡ്മിനിസ്ട്രേറ്റീവ് ട്രിബ്യൂണലില് മാത്രമാണ് നിയമനം നടത്തിയതെന്ന് സോളിസിറ്റര് ജനറല് തുഷാർ മേത്ത കോടതിയെ അറിയിച്ചു. ഇതാണ് കോടതിയുടെ രൂക്ഷവിമർശനത്തിന് വഴിവെച്ചത്. നിയമനങ്ങൾ പൂർത്തിയക്കാത്തതിനാൽ പല ട്രിബ്യൂണലുകളും അടച്ചുപൂട്ടലിന്റെ വക്കിലാണെന്ന് കോടതി ചൂണ്ടിക്കാട്ടി. രാജ്യത്തെ ട്രിബ്യൂണലുകളെ ദുര്ബലപെടുത്താന് സര്ക്കാര് ശ്രമിക്കുന്നുവെന്ന് കോടതി ആരോപിച്ചു.
ട്രിബ്യൂണൽ നിയമനങ്ങളിൽ പുതിയ പരിഷ്കാരങ്ങൾ ഏർപ്പെടുത്തികൊണ്ട് നേരത്തെ കേന്ദ്ര സർക്കാർ ഓർഡിനൻസ് കൊണ്ടുവന്നിരുന്നു. ഓർഡിനൻസ് പരിശോധിച്ച സുപ്രീംകോടതി ഓർഡിനൻസിലെ വ്യവസ്ഥകൾ റദ്ദാക്കിയിരുന്നു. എന്നാൽ കഴിഞ്ഞ പാർലമെന്റ് സമ്മേളത്തിൽ സുപ്രീംകോടതി റദ്ദാക്കിയ ഓർഡിനൻസിലെ വ്യവസ്ഥകൾ അതേപടി അവർത്തിച്ചുകൊണ്ട് ട്രിബ്യൂണൽ പരിഷ്കരണ നിയമം കേന്ദ്ര സർക്കാർ പാസാക്കി. ഇതിനെതിരെ കോൺഗ്രസ് നേതാവ് ജയറാം രമേശ് അടക്കമുള്ളവർ സമർപ്പിച്ച ഹർജികൾ പരിഗണിക്കവേയാണ് കോടതിയുടെ വിമർശനം.
കേന്ദ്ര സർക്കാർ നടപടി പരിശോധിച്ച് നിയമവിരുദ്ധമെന്ന് സുപ്രീംകോടതി പ്രഖ്യാപിച്ച ശേഷം അതെ കാര്യംതന്നെ പുതിയ നിയമനിർമാണത്തിലൂടെ തിരികെ കൊണ്ടുവരുന്നത് എന്ത് നടപടിയാണെന്ന് കോടതി ആരാഞ്ഞു. ഇത് കോടതി വിധികളെ ബഹുമാനിക്കാത്ത നടപടിയാണ്. അത് അംഗീകരിക്കാനാവില്ല. കോടതിയുടെ ക്ഷമ പരീക്ഷിക്കരുത്. എത്രയും പെട്ടെന്ന് നേരത്തെയുള്ള കോടതി വിധിയുടെ അടിസ്ഥാനത്തിൽ ട്രിബ്യൂണൽ നിയമനങ്ങൾ നടത്തണമെന്നും കോടതി ആവശ്യപ്പെട്ടു. നിയമനങ്ങൾ പൂർത്തിയാക്കുവാൻ ഒരാഴ്ച സമയം കോടതി കേന്ദ്ര സർക്കാരിന് അനുവദിച്ചു. ചീഫ് ജസ്റ്റിസ് എൻ വി രമണ, ജസ്റ്റിസ് ഡി വൈ ചന്ദ്രചൂഡ്, ജസ്റ്റിസ് എൽ നാഗേശ്വര റാവു എന്നിവരടങ്ങിയ ബെഞ്ചാണ് വിമർശനമുന്നയിച്ചത്.
