ഷോപ്പിങ് മാളുകൾ ബുധനാഴ്ച മുതൽ തുറക്കും; തിങ്കൾ മുതൽ ശനി വരെ പ്രവർത്തിക്കും

തിരുവനന്തപുരം: സംസ്ഥാനത്ത് കടകൾക്ക് ബാധകമായ നിയന്ത്രണങ്ങൾ പാലിച്ച് ഷോപ്പിങ് മാളുകൾ തുറന്നു പ്രവർത്തിക്കാൻ അനുമതി. തിങ്കൾ മുതൽ ശനി വരെ മാളുകൾക്ക് പ്രവർത്തിക്കാം. ബുധനാഴ്ച മുതൽ രാവിലെ ഏഴു തൊട്ട് വൈകിട്ട് ഒമ്പതുവരെ മാളുകൾ തുറന്നു പ്രവർത്തിക്കാനാകും. കൊവിഡ് അവലോകന യോഗത്തിൽ മുഖ്യമന്ത്രിയാണ് ഇക്കാര്യം വ്യക്തമാക്കിയത്.

ഓഗസ്റ്റ് ഒമ്പതു മുതൽ 31 വരെ വാക്സിനേഷൻ യജ്ഞം നടത്തുമെന്ന് മുഖ്യമന്ത്രി പിണറായി വിജയൻ പറഞ്ഞു. ഇതിന്റെ ഭാഗമായി പൊതുവിൽ വാക്സിനേഷൻ വർദ്ധിപ്പിക്കും. അവസാന വർഷ ഡിഗ്രി, പിജി വിദ്യാർത്ഥികൾക്കും എൽപി, യുപി സ്കൂൾ അധ്യാപകർക്കുമുള്ള വാക്സിനേഷൻ പൂർത്തീകരിക്കുക യജ്ഞത്തിന്റെ ലക്ഷ്യമാണെന്ന് മുഖ്യമന്ത്രി പറഞ്ഞു. സംസ്ഥാന സർക്കാരിനു ലഭിക്കുന്ന വാക്സിനു പുറമേ സ്വകാര്യ മേഖലയ്ക്ക് വാക്സിൻ ലഭ്യമാക്കേണ്ടതുണ്ട്. അതിനായി ഇരുപത് ലക്ഷം ഡോസ് വാക്സിൻ വാങ്ങി സ്വകാര്യ ആശുപത്രികൾക്ക് അതേ നിരക്കിൽ നൽകുമെന്നും മുഖ്യമന്ത്രി പറഞ്ഞു.

വാണിജ്യ വ്യവസായ സ്ഥാപനങ്ങൾക്കും പൊതു സംഘടനകൾക്കും ആശുപത്രികളുമായി ചേർന്ന് സമീപ പ്രദേശങ്ങളിൽ വാക്സിനേഷൻ നടത്താനാകും. ഇതിനുള്ള സൗകര്യം തദ്ദേശ സ്വയംഭരണ സ്ഥാപനങ്ങളുടെ സഹായത്തോടെ ഒരുക്കാനാകും. എത്രയും വേഗം പരമാവധി ആളുകളെ വാക്സിനേറ്റ് ചെയ്യുകയാണ് ലക്ഷ്യം. കിടപ്പു രോഗികൾക്ക് വീട്ടിലെത്തിച്ച് വാക്സിൻ നൽകുമെന്നും അദ്ദേഹം വ്യക്തമാക്കി.