ന്യൂഡൽഹി
പാപ്പർ–- കടബാധ്യത ചട്ട ഭേദഗതി ബില്ലിന്മേലുള്ള ചർച്ചയ്ക്കിടെ രാജ്യസഭയിൽ പെഗാസസ് ഫോൺ ചോർത്തൽ വിഷയം ഉയര്ത്തി ജോൺ ബ്രിട്ടാസ്. പെഗാസസ് ചര്ച്ചയ്ക്ക് തയ്യാറാകാതെ ഇരുസഭയിലും കേന്ദ്രം മുഖംതിരിഞ്ഞുനിൽക്കെ അപ്രതീക്ഷിതമായി രാജ്യസഭയിൽ വിഷയം ഉന്നയിക്കപ്പെട്ടത് സര്ക്കാരിനെ പ്രതിരോധത്തിലാക്കി.
ചട്ടഭേദഗതി എതിര്ത്ത ബ്രിട്ടാസ്, മോഡി സർക്കാരിന്റെ ജനാധിപത്യവിരുദ്ധ നടപടികളെക്കുറിച്ചും പെഗാസസ് ഫോൺ ചോർത്തലിനെക്കുറിച്ചും സംസാരിച്ചു. മോഡി ഭരണത്തിൽ സമ്പദ്വ്യവസ്ഥ മാത്രമല്ല, ഭരണവ്യവസ്ഥതന്നെ തകർക്കപ്പെടുന്നു. ജനാധിപത്യത്തെ താങ്ങിനിർത്തുന്ന സ്തംഭങ്ങളെ പെഗാസസ് തകർത്തു. എല്ലാവരും നിരീക്ഷണത്തിലാണ്. ഭരണകക്ഷിയംഗങ്ങൾപോലും സർക്കാർ നിരീക്ഷണത്തിലാണ്–- ബ്രിട്ടാസ് പറഞ്ഞു.
പെഗാസസിലേക്ക് വിഷയം മാറിയതോടെ ധനമന്ത്രി നിർമല സീതാരാമന്റെ നേതൃത്വത്തിൽ ഭരണകക്ഷിയംഗങ്ങൾ ബഹളം തുടങ്ങി. ബില്ലിനെക്കുറിച്ച് സംസാരിക്കണമെന്ന് ചെയറിലുള്ള ഭുവനേശ്വർ കലിത നിർദേശിച്ചപ്പോൾ താങ്കളടക്കം നിരീക്ഷണത്തിലാണെന്ന് ബ്രിട്ടാസ് പറഞ്ഞു.
