സ്വകാര്യ വ്യക്തി സമർപ്പിച്ച ഹർജി ജസ്റ്റിസുമാരായ അലക്സാണ്ടർ തോസിൻ്റെയും എ ബദറുദീൻ്റേയും ബഞ്ചാണ് പരിഗണിച്ചത്. ഹർജി തള്ളിക്കൊണ്ടായിരുന്നു കോടതിയുടെ പരാമർശം ഉണ്ടായത്. സർക്കാർ വരുമാനത്തിൻ്റെ 75 ശതമാനവും ചെലവാക്കുന്നത് ശമ്പളത്തിനും മറ്റ് ആനുകൂല്യങ്ങൾകും വേണ്ടിയാണ്. സർക്കാർ ജോലിയാണ് ആവശ്യമെന്നത് പുതുതലമുറയുടെ നിലപാടാണ്. എംഎസ്‌സി പഠിക്കുന്നവര്‍ക്കും ആടുകളെ വളര്‍ത്താം. അതിന് തയാറാകാത്തതാണ് പ്രശ്‌നമെന്നും കോടതി പറഞ്ഞു.
സർക്കാർ ജോലി വേണമെന്ന നിലപാട് കേരളത്തിൽ മാത്രമാണുള്ളതെന്ന് വ്യക്തമാക്കിയ കോടതി കേന്ദ്ര സർക്കാരിന് മാത്രമാണ് നോട്ട് അച്ചടിക്കാൻ അവകാശമുള്ളതെന്നും പറഞ്ഞു. കൊവിഡ്-19 പ്രതിസന്ധിയെ തുടർന്ന് രാജ്യത്തിൻ്റെ ജിഡിപി കുറഞ്ഞ അവസ്ഥയാണ് നിലവിലുള്ളതെന്നും കൂട്ടിച്ചേർത്തു.
പിഎസ്സി ആവശ്യപ്പെട്ട സമയത്ത് എക്സ്പീരിയൻസ് സർട്ടിഫിക്കറ്റ് സമർപ്പിക്കാൻ കഴിയാത്തതിനെ തുടർന്ന് അവസരം നഷ്ടമായ ഒരളാണ് ഹർജിയുമായി ഹൈക്കോടതിയെ സമീപിച്ചത്. ഇയാളുടെ ഹർജി തള്ളിക്കൊണ്ടാണ് കോടതിയുടെ പരാമർശം ഉണ്ടായത്.
