സംഭവം വിവാദമായതോടെ രജിസ്ട്രാറും ഹോസ്റ്റൽ വാർഡനും പോലീസിൽ പരാതി നൽകി. കളമശേരി സി ഐക്കും എറണാകുളം സിറ്റി പോലീസ് കമ്മീഷണർക്കുമാണ് പരാതി നൽകിയത്. പരീക്ഷ അട്ടിമറിക്കാൻ നടന്ന ആസൂത്രണമായ ശ്രമമാണോ എന്ന സംശയവും ശക്തമാണ്. വാട്ട്സാപ്പ് ഗ്രൂപ്പുകളിലൂടെ വിവരം പുറത്തായതിന് പിന്നാലെ ആന്റിജൻ ടെസ്റ്റ് ഫലത്തിലുള്ള രണ്ടു ക്യൂആർ കോഡുകളിൽ നടത്തിയ തിരുത്തലുകളാണ് പിടിയിലാകാൻ കാരണമായത്.
കൊവിഡ് മറച്ചുവച്ച് പരീക്ഷയെഴുതാൻ മുഹമ്മദ് സനൂബ് വലിയ തോതിലുള്ള ആസൂത്രണം നടത്തിയിരുന്നു. ഹോസ്റ്റലിൽ താമസിച്ച് പരീക്ഷയെഴുതുന്നതിനായി ഹോസ്റ്റലിൽ നൽകിയ രേഖയിലും തിരുത്തൽ വരുത്തി. ജൂലൈ 27ന് കളമശേരിയിൽ കൊവിഡ് പരിശോധനയ്ക്ക് വിധേയനായ സനൂബ് ഇതേ പേരിൽ മറ്റൊരാളെക്കൊണ്ട് മലപ്പുറത്ത് കൊവിഡ് പരിശോധന നടത്തി ആർടിപിസിആർ ഫലം നെഗറ്റീവായ സർട്ടുഫിക്കറ്റ് സ്വന്തമാക്കി. ഇതോടെ നേരത്തെ നടത്തിയ ആൻ്റിജൻ പരിശോധനയിൽ തിരുത്തൽ വരുത്തിയെന്നും കണ്ടെത്തി.
തെറ്റായ രേഖകൾ ഹാജരാക്കി ഹാളിലെത്തി സനൂബ് പരീക്ഷയെഴുതി. ഇരുപതിലധികം വിദ്യാർഥികൾ ഹാളിൽ ഉണ്ടായിരുന്നു. ഇവരിൽ നാല് പേർക്കാണ് കൊവിഡ് സ്ഥിരീകരിച്ചത്. വിദ്യാർഥിയുമായി അധ്യാപകർക്കും സമ്പർക്കം പുലർത്തേണ്ടി വന്നു. അതേസമയം, ഹോസ്റ്റലിൽ ഒറ്റയ്ക്കാണ് സനൂബ് താമസിച്ചിരുന്നതെന്ന് കണ്ടെത്തി. മാർച്ചിൽ നടത്തിയ പരീക്ഷയിൽ പങ്കെടുക്കാൻ കഴിയാതെ പോയവർക്കാണ് കുസാറ്റ് വീണ്ടും പരീക്ഷ നടത്തിയത്.
