തിരുവനന്തപുരം: നിയമസഭാ കയ്യാങ്കളി കേസിൽ സുപ്രീം കോടതി പരാമർശത്തെ തുടർന്ന് വിദ്യാഭ്യാസമന്ത്രി വി. ശിവൻകുട്ടി രാജിവെക്കണമെന്നാവശ്യപ്പെട്ടുള്ള കെ.എസ്.യു മാർച്ചിൽ സംഘർഷം. പ്രവർത്തകർ ക്ലിഫ് ഹൗസിലേക്ക് നടത്തിയ മാർച്ചിലാണ് സംഘർഷമുണ്ടായത്. പോലീസും പ്രവർത്തകരും തമ്മിൽ ഉന്തുംതള്ളുമുണ്ടായി.
ശിവൻകുട്ടി രാജിവെച്ചില്ലെങ്കിൽ മന്ത്രിസഭയിൽ നിന്ന് പുറത്താക്കാൻ മുഖ്യമന്ത്രി തയ്യാറാകണമെന്ന് ആവശ്യപ്പെട്ടായിരുന്നു മാർച്ച്. ദേവസ്വം ബോർഡ് ജംങ്ഷനിൽ പോലീസ് ബാരിക്കേട് കെട്ടി അടച്ചിരുന്നു. ഇത് മറികടന്ന് മുന്നോട്ട് പോകാൻ പ്രവർത്തകർ ശ്രമിച്ചതോടെയാണ് സംഘർഷമുണ്ടായത്. ബാരിക്കേഡിന് മുകളിൽ കയറി പ്രതിഷേധിച്ച പ്രവർത്തകരെ പോലീസ് ബലം പ്രയോഗിച്ച് താഴെയിറക്കുകയായിരുന്നു.
ഇതിന് പിന്നാലെ പ്രവർത്തകർ ക്ലിഫ്ഹൗസിലേക്കുള്ള റോഡിൽ ഇരുന്ന് മുദ്രാവാക്യം മുഴക്കുകയും ചെയ്തു. വാക്കേറ്റത്തിനും സംഘർഷത്തിനുമൊടുവിലാണ് പ്രവർത്തകരെ അറസ്റ്റ് ചെയ്ത് മാറ്റിയത്. അറസ്റ്റ് നടക്കുന്ന വേളയിലും ഇരുവിഭാഗവും തമ്മിൽ വാക്കേറ്റമുണ്ടായി.
Content Highlights: police action against KSU march demanding V Shivankutti`s resignation
