ഇടുക്കി: മുല്ലപ്പെരിയാർ അണക്കെട്ടിലെ ജലനിരപ്പ് 136 അടിയോട് അടുക്കുന്നു. 135.80 അടിയാണ് ഇപ്പോഴത്തെ ജലനിരപ്പ്. 140 അടിയിലെത്തിയാൽ ഒന്നാമത്തെ ജാഗ്രതാ നിർദ്ദേശം നൽകും. 142 അടിയിലെത്തിയാൽ മൂന്നാമത്തെ ജാഗ്രതാ നിർദ്ദേശം പുറപ്പെടുവിച്ച് ഷട്ടറുകൾ തുറക്കും.
അണക്കെട്ടിന്റെ സ്പിൽവേ ഷട്ടറുകൾ ഉയർത്തി വെള്ളം ഒഴുക്കേണ്ടതിനാൽ ആവശ്യമായ മുൻകരുതലുകൾ സ്വീകരിക്കാൻ ജില്ലാ കളക്ടർക്ക് നിർദ്ദേശം നൽകിയിട്ടുണ്ട്. പെരിയാറിന്റെ തീരത്ത് താമസിക്കുന്നവരെ പാർപ്പിക്കാൻ കെട്ടിടങ്ങൾ കണ്ടെത്താൻ നിർദ്ദേശമുണ്ട്.
ജലനിരപ്പ് 136 അടിയിലെത്തിയാൽ ബന്ധപ്പെട്ട വില്ലേജ് ഓഫീസുകളിൽ കൺട്രോൾ റൂം തുറക്കണം. വൈഗ അണക്കെട്ടിൽ പരമാവധി വെള്ളം ഉള്ളതിനാൽ തമിഴ്നാട് നിലവിൽ വെള്ളം കൊണ്ടുപോകുന്നില്ല. മുല്ലപ്പെരിയാറിലെ ജലനിരപ്പ് കുറയ്ക്കാൻ തമിഴ്നാടിനോട് കൂടുതൽ വെള്ളം കൊണ്ടുപോകാൻ ജലവിഭവ വകുപ്പ് മന്ത്രി തമിഴ്നാടിനോട് ആവശ്യപ്പെട്ടിരുന്നു.
