തിരുവനന്തപുരം > ഇന്ത്യയിലെ പ്രമുഖ റേറ്റിങ് കമ്പനിയായ ‘ക്രിസിലി’ന്റെ പട്ടികയിൽ തിരുവനന്തപുരം ടെക്നോപാർക്കിന് ഉയർന്ന സ്ഥാനം. ക്രിസിൽ പ്രസിദ്ധീകരിച്ച ഏറ്റവും പുതിയ ക്രെഡിറ്റ് റേറ്റിങ്ങിൽ ടെക്നോപാർക്കിന് ‘എ പ്ലസ്/ സ്റ്റേബ്ൾ’ ലഭിച്ചു.
ആദ്യമായാണ് ടെക്നോപാർക്കിന് ഈ അംഗീകാരം. ദീർഘകാല സാമ്പത്തിക പദ്ധതികളിലെ മികവും ഭദ്രതയുമാണ് ടെക്നോപാർക്കിന് ഉയർന്ന സുരക്ഷിതത്വമുള്ള റേറ്റിങ് നേടിക്കൊടുത്തത്. രണ്ടു വർഷമായി ‘എ/ സ്റ്റേബ്ൾ’ ആയിരുന്നു റേറ്റിങ്. കോവിഡ് പ്രതിസന്ധിഘട്ടത്തിലും കാഴ്ചവച്ച വായ്പാതിരിച്ചടവിലെ കൃത്യത, സാമ്പത്തിക അച്ചടക്കം എന്നിവയ്ക്കുള്ള അംഗീകാരമാണ് ഇത്.
അമേരിക്കയിലെ എസ് ആൻഡ് പി ഗ്ലോബലിന്റെ അനുബന്ധ കമ്പനിയാണ് ക്രിസിൽ. നാൽപ്പതോളം പുതിയ കമ്പനി ടെക്നോപാർക്കിലെത്തിയത് ഇവിടത്തെ മികച്ച അടിസ്ഥാന സൗകര്യങ്ങളുടെ തെളിവാണെന്ന്- ടെക്നോപാർക്ക് സിഇഒ ജോൺ എം തോമസ് പറഞ്ഞു.
