കൊച്ചി > സംസ്ഥാനത്തിനാവശ്യമായ മരുന്നുകളും ആരോഗ്യരക്ഷാ ഉപകരണങ്ങളും തദ്ദേശീയമായി തന്നെ നിര്മ്മിക്കാന് വ്യവസായ, ആരോഗ്യ വകുപ്പുകൾ ചേർന്ന് ഒരു പരിപാടി തയ്യാറാക്കുകയാണെന്ന് മന്ത്രി പി രാജീവ്. ഇതിനായി ആരോഗ്യ, വ്യവസായ വകുപ്പ് പ്രിന്സിപ്പല് സെക്രട്ടറിമാരും കെഎംഎസ്സിഎല്., കെഎസ്ഡിപിഎല് മാനേജിങ് ഡയറക്ടര്മാരും ചേര്ന്ന കമ്മിറ്റിക്ക് രൂപം നൽകും.
സംസ്ഥാനത്തിന് ആവശ്യമുള്ള മരുന്നുകളുടെ ശരാശരി 10 ശതമാനം മാത്രമാണ് കേരളത്തില് നിര്മ്മിക്കുന്നത്. 90 ശതമാനവും മറ്റ് സംസ്ഥാനങ്ങളില് നിന്നാണ് കെ.എം.എസ്.സി.എല്. വാങ്ങുന്നത്.
കേരള മെഡിക്കൽ സർവ്വീസസ് കോർപ്പറേഷനും വ്യവസായ വകുപ്പിന് കീഴിലുള്ള ഏജൻസികളും ചേർന്ന സംയുക്ത സംരംഭത്തെക്കുറിച്ചാണ് ആലോചിക്കുന്നത്. കുറഞ്ഞ നിരക്കിൽ ആരോഗ്യ മേഖലക്കാവശ്യമായ ഉൽപന്നങ്ങൾ ലഭ്യമാക്കുകയും ആഭ്യന്തര വ്യവസായങ്ങൾക്ക് കൂടുതൽ അവസരങ്ങൾ സൃഷ്ടിക്കുകയും ചെയ്യുക എന്നതാണ് സർക്കാരിന്റെ ലക്ഷ്യം.
സംസ്ഥാനത്തെ പൊതുമേഖലാ, ചെറുകിട വ്യവസായ യൂണിറ്റുകളിൽ നിന്ന് സാധനങ്ങൾ വാങ്ങാൻ കെ.എം.എസ്.സി.എല്ലിന് നിലവിൽ തന്നെ മുൻഗണനാ നയമുണ്ട്. ഇത് കൂടുതൽ കാര്യക്ഷമമാക്കാനാണ് സംയുക്ത സംരംഭത്തിലൂടെ ലക്ഷ്യമിടുന്നത്.
സംസ്ഥാന സർക്കാർ ആരംഭിക്കുന്ന ഫാർമ പാർക്കിൽ ഒട്ടേറെ വ്യവസായികൾ നിക്ഷേപത്തിന് താൽപര്യമറിയിച്ചിട്ടുണ്ട്. അവർക്കാവശ്യമായ പ്രോത്സാഹന പദ്ധതികളും തയ്യാറാക്കും. പുതുതായി ആരംഭിക്കുന്ന ലൈഫ് സയൻസ് പാർക്കിൽ മെഡിക്കൽ ഉപകരണ നിർമ്മാതാക്കളും നിക്ഷേപത്തിന് സന്നദ്ധത അറിയിച്ചിട്ടുണ്ട്. ആരോഗ്യ വകുപ്പ് ഇത്തരം സംരംഭകരുടെ ഉൽപന്നങ്ങൾക്ക് മുൻഗണന നൽകുന്നതിലൂടെ ആഭ്യന്തര ഉൽപാദനം വർധിപ്പിക്കുമെന്നും മന്ത്രി പറഞ്ഞു.
