കൊച്ചി > പ്രവാസ ജീവിതത്തിന്റെ നാൽപതാം വാർഷികം ആഘോഷിച്ച് പ്രവാസി വ്യവസായിയും വർഗീസ് മൂലൻസ് ഗ്രൂപ്പിന്റെ ചെയർമാനുമായ ഡോ. വർഗീസ് മൂലൻ. ഒന്നേകാൽ കോടി രൂപ വിലവരുന്ന കിറ്റുകൾ 20,000ത്തിലധികം കുടുംബങ്ങൾക്ക് വിതരണം ചെയ്തു.
വർഗീസ് മൂലൻസ് ഫൗണ്ടേഷൻ സംഘടിപ്പിച്ച കിറ്റ് വിതരണത്തിന്റെ ഉദ്ഘാടനം മന്ത്രി പി രാജീവ്, അങ്കമാലി മുൻസിപ്പൽ ചെയർമാൻ റെജി മാത്യുവിന് നൽകിക്കൊണ്ട് നിർവഹിച്ചു. പ്രതിപക്ഷ നേതാവ് വി ഡി സതീശൻ മുഖ്യപ്രഭാഷണം നടത്തി. അങ്കമാലി എംഎൽഎ റോജി എം ജോൺ അധ്യക്ഷനായി.
കൂപ്പണുകൾ പഞ്ചായത്തുകൾ വഴിയും, കോഴിയും, മസാലകളും പച്ചക്കറിയും, ധാന്യങ്ങളും, ചുക്കുകാപ്പിയും, മാസ്കും, കൺസ്യൂമർ കാർഡും ഉൾപ്പെടുന്ന കിറ്റുകൾ അങ്കമാലി ടി ബി ജംഗ്ഷനിലെ മൂലൻസ് ഹൈപ്പർമാർട്ട് വഴിയുമാണ് വിതരണം ചെയ്യപ്പെടുന്നത്.
കിറ്റുകൾ കൂടാതെ വർഗീസ് മൂലൻസ് ഗ്രൂപ്പിൽ 25 വർഷം തികച്ച തൊഴിലാളികൾക്ക് കാറുകൾ, 15 വർഷം പൂർത്തിയാക്കിയവർക്ക് ബൈക്കുകൾ, 10 വർഷം തികച്ചവർക്ക് 25,000/ രൂപ വീതമുള്ള സമ്മാനങ്ങളും വിതരണം ചെയ്തു.
സുഗന്ധവ്യഞ്ജനങ്ങൾ ഉൾപ്പടെയുള്ള ഭക്ഷ്യോൽപ്പാദനം, കയറ്റുമതി, ഇറക്കുമതി, വിദേശ രാജ്യങ്ങളിലെ ഫാക്ടറിവിതരണ ശൃംഖലകൾ, ഓർഗാനിക് തോട്ടങ്ങൾ, റീറ്റെയിൽ ചെയിൻ മാർക്കറ്റുകൾ, ഇകൊമേഴ്സ്, ടെക്സ്റ്റയിൽസ്, മെൻസ് ഗ്രൂമിംഗ് ഇൻഡസ്ട്രീ, സിനിമ തുടങ്ങിയ മേഖലകളിൽ പ്രവർത്തിക്കുന്ന വർഗീസ് മൂലൻസ് ഗ്രൂപ്പിന് ഇന്ത്യയിലും ഗൾഫിലും അമേരിക്ക, യൂറോപ്പ്, ഓസ്ട്രേലിയ, ചൈന, കിഴക്കനേഷ്യ എന്നിവിടങ്ങളിലുമായി 350ലധികം ഉൽപ്പന്നങ്ങൾ വിതരണം ചെയ്യുന്നു.
201 നിർധന കുട്ടികൾക്കുള്ള ഹൃദയ ശസ്ത്രക്രിയകൾ, വീടുകൾ, വിവാഹ സഹായങ്ങൾ, സ്കോളർഷിപ്പുകൾ, ഭക്ഷ്യകിറ്റ് വിതരണം തുടങ്ങി ഏഴര കോടിയിലധികം രൂപയുടെ ചാരിറ്റി പദ്ധതികൾ വർഗീസ് മൂലൻ ഫൗണ്ടേഷൻ ഇതിനോടകം നടപ്പിലാക്കിയിട്ടുണ്ട്. ഐഎസ്ആർഒ ചാരക്കേസിനെ ആസ്പദമാക്കി ആറ് രാജ്യങ്ങളിൽ ഷൂട്ട് ചെയ്ത് ആറ് ഭാഷകളിൽ പുറത്തിറങ്ങുന്ന റോക്കട്രീയെന്ന ഹോളിവുഡ് സിനിമയുടെ നിർമ്മാതാവാണ് ഡോ. വർഗീസ് മൂലൻ.
