ആലപ്പുഴ: മുതിർന്ന സിപിഎം നേതാവും മുൻ മന്ത്രിയുമായ ജി സുധാകരനെതിരെ അന്വേഷണവുമായി സിപിഎം. അമ്പലപ്പുഴയിലെ തെരഞ്ഞെടുപ്പ് വീഴ്ചകളിലാണ് അന്വേഷണം നടക്കുക. അന്വേഷണത്തിന് എളമരം കരീം, കെജെ തോമസ് എന്നിവർ ഈ മാസം 25 ന് ആലപ്പുഴയിലെത്തും.
പാർട്ടി നിയന്ത്രണത്തിലുള്ള ആലപ്പുഴ പടനിലം സ്കൂളിന്റെ ഫണ്ട് തിരിമറിയിൽ ജില്ലാ സെക്രട്ടറിയേറ്റ് അംഗം കെ രാഘവൻ, ഏരിയാ കമ്മിറ്റി അംഗങ്ങളായ രഘു, മനോഹരൻ എന്നിവരോട് വിശദീകരണം തേടാൻ ഇന്നു ചേർന്ന ജില്ലാ കമ്മിറ്റി യോഗം തീരുമാനിച്ചു. ഇവർ കുറ്റക്കാരാണെന്ന അന്വേഷണ റിപ്പോർട്ട് ജില്ലാ കമ്മിറ്റി അംഗീകരിച്ചു. ജി സുധാകരനെ അനുകൂലിക്കുന്നവരാണ് ഇവർ.
തെരഞ്ഞെടുപ്പിൽ ജി സുധാകരൻ അലംഭാവം കാണിച്ചെന്നാണ് പരാതി. അന്വേഷണം രണ്ട് മാസത്തിനുള്ളിൽ പൂർത്തിയാകും. അടുത്ത സംസ്ഥാന കമ്മിറ്റിക്കു മുമ്പ് അന്വേഷണം പൂർത്തിയായേക്കും.
