ചൊവ്വാഴ്ച (06-07-2021) നടക്കുന്ന കളക്ടർമാരുടെ യോഗത്തിന് ശേഷം ഇളവുകൾ നൽകണോ എന്ന കാര്യത്തിൽ തീരുമാനമെടുക്കും. ചൊവ്വാഴ്ചത്തെ വാർത്താസമ്മേളനത്തിൽ മുഖ്യമന്ത്രി ലോക്ക് ഡൗൺ ഇളവുകളടക്കമുള്ള വിവരങ്ങൾ പങ്കുവയ്ക്കും.
കൊവിഡ് ടെസ്റ്റ് പോസിറ്റിവിറ്റി നിരക്ക് ഉയർന്ന തോതിലുള്ള വടക്കൻ ജില്ലകളിൽ പരിശോധനകൾ വർധിപ്പിക്കാൻ മുഖ്യമന്ത്രിയുടെ നേതൃത്വത്തിൽ ചേർന്ന ഇന്നത്തെ യോഗം തീരുമാനിച്ചു. ടെസ്റ്റുകൾ വർധിപ്പിച്ചതാണ് ടെസ്റ്റ് പോസിറ്റിവിറ്റി നിരക്ക് വർധിക്കാൻ കാരണമായതെന്ന് യോഗം വിലയിരുത്തി. ആശങ്കപ്പെടേണ്ട സാഹചര്യം സംസ്ഥാനത്തില്ല. എന്നാൽ ജാഗ്രത തുടരേണ്ടത് ആവശ്യമാണെന്നും യോഗം വിലയിരുത്തി.
കൊവിഡ് കേസുകളിൽ കുറവില്ലാത്തതിനാൽ സംസ്ഥാനത്ത് കൂടുതൽ ഇളവുകൾ ഉണ്ടായേക്കില്ല എന്നാണ് പുറത്തുവരുന്നത്. ലോക്ക് ഡൗൺ നിയന്ത്രണങ്ങളിലൂടെ ടി പി ആർ നിരക്ക് അഞ്ചിൽ താഴെ എത്തിക്കാനാണ് സർക്കാർ ലക്ഷ്യമാക്കുന്നത്. അതേസമയം, കൊവിഡിൻ്റെ മൂന്നാം തരംഗത്തിനുള്ള സാധ്യതകൾ നിലനിൽക്കുന്നതിനാൽ ഈ സാഹചര്യം തടയാനുള്ള ഒരുക്കങ്ങൾ വിലയിരുത്തുന്നതിനായി കേന്ദ്ര സംഘം ഇന്ന് രാവിലെ കേരളത്തിലെത്തി. അവശ്യമായ നടപടികൾ, ചികിത്സാ സൗകര്യങ്ങൾ, ആവശ്യമായ സജ്ജീകരങ്ങൾ എന്നിവയാകും സംഘം പരിശോധിക്കുക.
