കൊച്ചി: തിരുവനന്തപുരം അടിമലത്തുറയിൽ വളർത്തുനായയെ അടിച്ചു കൊന്ന സംഭവത്തിൽ ഹൈക്കോടതി സ്വമേധയാ കേസെടുത്തു. ജസ്റ്റിസ് എ കെ ശങ്കരൻ നമ്പ്യാരുടെ കത്തിന്റെ അടിസ്ഥാനത്തിലാണ് കേസെടുക്കാൻ നിർദ്ദേശിച്ചിരിക്കുന്നത്. സംഭവത്തിനെതിരെ ശക്തമായ പ്രതിഷേധമാണ് സോഷ്യൽ മീഡിയയിൽ ഉയരുന്നത്.
അടിമലത്തുറയിലെ ക്രിസ്തുരാജ് എന്നയാളുടെ ലാബ്രഡോർ ഇനത്തിൽ പെട്ട നായയെയാണ് മൂന്നു പേർ ചേർന്ന് അടിച്ചു കൊന്നത്. ചൂണ്ടയിൽ കൊളുത്തിയിട്ട ശേഷമാണ് നായയ്ക്കെതിരെ ക്രൂര മർദ്ദനം അഴിച്ചുവിട്ടത്.
വള്ളത്തിന്റെ അടിയിൽ നായ പോയി കിടന്നതാണ് അക്രമി സംഘത്തെ പ്രകോപിപ്പിച്ചതെന്ന് ക്രിസ്തുരാജ് പറഞ്ഞു. സംഭവത്തിന്റെ ദൃശ്യങ്ങൾ ക്രിസ്തുരാജ് ഫേസ്ബുക്കിലൂടെ പുറത്തുവിട്ടിരുന്നു. സംഭവം പുറത്തായതോടെ കനത്ത പ്രതിഷേധമാണ് ഉയർന്നത്. ദൃശ്യങ്ങൾ പുറത്തു വന്നതോടെ ആക്രമി സംഘം ക്രിസ്തുരാജിന്റെ വീട്ടിലെത്തി ഭീഷണിപ്പെടുത്തിയിരുന്നു.
താനിപ്പോൾ പുറത്തിറങ്ങാൻ കഴിയാത്ത അവസ്ഥയിലാണെന്ന് ക്രിസ്തുരാജ് പറഞ്ഞു. തന്റെ വീട്ടിലെത്തിയ സംഘം സാധനങ്ങൾ വലിച്ചെറിയുകയും സഹോദരിയെ മർദ്ദിക്കാൻ ശ്രമിച്ചെന്നും അദ്ദേഹം വ്യക്തമാക്കിയിരുന്നു.
