കൊച്ചി: കിറ്റക്സിൽ തൊഴിൽ വകുപ്പ് നടത്തിയ പരിശോധന രാഷ്ട്രീയ ഗൂഢാലോചനയുടെ ഭാഗമെന്ന് കമ്പനി. ഹൈക്കോടതി സ്റ്റേ ചെയ്ത ഉത്തരവ് നടപ്പാക്കണമെന്ന് ആവശ്യപ്പെട്ടാണ് തൊഴിൽ വകുപ്പ് നോട്ടീസ് നൽകിയതെന്നും നോട്ടീസ് പിൻവലിച്ചില്ലെങ്കിൽ കോടതി അലക്ഷ്യ നടപടിയുമായി മുന്നോട്ടു പോകുമെന്നും സാബു എം ജേക്കബ് വ്യക്തമാക്കി.
ഹൈക്കോടതി ഉത്തരവ് ഉദ്യോഗസ്ഥന്മാരുടെ ശ്രദ്ധയിൽപ്പെട്ടില്ലെന്നും വീഴ്ച സംഭവിച്ചോയെന്ന് പരിശോധിക്കുമെന്നും എറണാകുളം ലേബർ ഓഫീസർ പറഞ്ഞു.
കഴിഞ്ഞ ദിവസമാണ് 2019 ലെ പുതുക്കിയ വേതന നിയമം കമ്പനി നടപ്പാക്കുന്നില്ലെന്നു ചൂണ്ടിക്കാട്ടി തൊഴിൽ വകുപ്പ് നോട്ടീസ് നൽകിയത്. ഇതിനെതിരെ നിരവധി സ്ഥാപനങ്ങൾ ചേർന്ന് കോടതിയെ സമീപിക്കുകയും അനുകൂല ഉത്തരവ് സംഘടിപ്പിക്കുകയും ചെയ്തതാണ്. കമ്പനിയെ അപകീർത്തിപ്പെടുത്തുകയാണ് ലക്ഷ്യമെന്നും സാബു എം ജേക്കബ് ആരോപിച്ചു.
നിക്ഷേപ പദ്ധതികളിൽ നിന്നും പിന്മാറുന്നുവെന്ന് വ്യക്തമാക്കിയതിനു പിന്നാലെയാണ് നോട്ടീസ് നൽകിയതെന്നും കമ്പനി ആരോപിക്കുന്നു. നോട്ടീസ് നേരത്തെ തപാൽ മാർഗം അയച്ചിരുന്നുവെന്നും അത് കമ്പനിക്ക് ലഭിക്കാത്തതിനാലാണ് നോട്ടീസ് നേരിട്ട് കൈമാറിയതെന്നും ലേബർ ഓഫീസർ പറഞ്ഞു.
