മൈസ്പേസ്, ഓർക്കുട്ട് തുടങ്ങിയ തലതൊട്ടപ്പന്മാരിൽ നിന്നും തികച്ചും വ്യത്യസ്തമാണ് നാം ഇന്ന് ഉപയോഗിക്കുന്ന പല സമൂഹ മാധ്യമങ്ങളും. പലതും നാം ഉപയോഗിക്കുന്നതും ചില പ്രത്യേക കാര്യങ്ങൾക്കാണ്. ട്വിറ്റർ പലരും വാർത്തകൾ പെട്ടെന്നറിയാണ് ഉപയോഗിക്കുന്നത്. ഫേസ്ബുക്കിലെയും യൂട്യൂബിലെയും വിഡിയോകൾ കണ്ട് രസിക്കുന്നവരാണ് നമ്മളിൽ പലരും. ഇൻസ്റ്റാഗ്രാം ചിത്രങ്ങൾക്ക് പ്രാധാന്യം നൽകുന്നു. ഇതൊന്നും താല്പര്യം ഇല്ലാത്തവർക്ക് ബ്ലോഗിങ്ങ് വെബ്സൈറ്റുകളുണ്ട്. കഴിഞ്ഞില്ല വൈൻ, സ്നാപ്പ്ചാറ്റ് എന്തിന് ലിങ്ക്ഡ്ഇൻ വരെ സോഷ്യൽ മീഡിയയുടെ പരിധിയിൽ വരും.
സമൂഹ മാധ്യമങ്ങൾ നമ്മളിലുണ്ടാക്കിയ സ്വാധീനം ചെറുതല്ല. പണ്ടെന്നും ഇല്ലാത്ത വിധം നാം ഇന്ന് കണക്ടഡ് ആണ്. ലോകത്തെ മറ്റേതോ കോണിനുള്ള നമ്മുടെ സുഹൃത്ത് ഇപ്പോൾ എന്ത് ചെയ്യുന്നു എന്നുള്ളത് പലപ്പോഴും വാട്സ്ആപ്പ് സ്റ്റാറ്റസുകളിലൂടെയും ഇൻസ്റ്റാഗ്രാം പോസ്റ്റുകളിലൂടെയും നാം മനസിലാക്കുന്നു. ഒരു വിഭവം തയ്യാറാക്കിയാൽ, ഒരു പുതിയ സ്ഥലത്തേക്ക് യാത്ര ചെയ്താൽ അതിന്റെ ഫോട്ടോ പോസ്റ്റ് ചെയ്യാതെ നമ്മളിൽ പലർക്കും ഉറക്കം വരില്ല.
സിനിമ താരങ്ങളെയും, കമ്പനികളുടെ തലപ്പത്തിരിക്കുന്നവരെയും പിന്തുടരാൻ ഏറ്റവും നല്ല മാർഗമാണ് ട്വിറ്റർ. പ്രശസ്തരായ പലർക്കും വെരിഫൈഡ് ആയ ട്വിറ്റർ അക്കൗണ്ടുണ്ട് എന്നത് തന്നെ കാരണം. ഒരുപരിധിവരെ കമ്പനികളുടെ പേടിസ്വപ്നമാണ് സമൂഹ മാധ്യമങ്ങൾ. ഒരു കമ്പനിയുടെ ഉത്പന്നമോ, സേവനമോ അത്ര പോരാ എന്നുണ്ടെങ്കിൽ ഉപഭോക്താക്കൾ ഇപ്പോൾ പ്രശ്നം ഉന്നയിക്കുന്നത് സമൂഹ മാധ്യമങ്ങളിലാണ്. കൂടുതൽ പേര് ഇവ കാണും എന്നുള്ളതുകൊണ്ട് തന്നെ കമ്പനികൾ പെട്ടന്ന് പ്രശ്നം പരിഹരിക്കാൻ ശ്രമിക്കും.
സോഷ്യൽ മീഡിയ ചില്ലറക്കാനല്ല
സോഷ്യൽ മീഡിയ ജനങ്ങൾക്ക് നൽകുന്ന ‘പവർ’ കുറച്ചൊന്നുമല്ല. ഉപഭോക്താക്കൾക്ക് തങ്ങളുടെ നിലപാടുകൾ, അഭിപ്രായങ്ങൾ, ആശയങ്ങൾ തുറന്ന് പറയാൻ അവസരമൊരുക്കുന്നു എന്നതാണ് സോഷ്യൽ മീഡിയയുടെ പ്രധാന സവിശേഷത. ഉപയോക്താക്കൾക്ക് ദൈനംദിന പ്രവർത്തനങ്ങൾ രേഖപ്പെടുത്താനും, അഭിപ്രായങ്ങൾ പങ്കിടാനും, അവരുടെ കഴിവുകൾ പ്രദർശിപ്പിക്കാനും കഴിയും. പലരെയും പ്രശസ്തരാക്കിയതും സമൂഹ മാധ്യമങ്ങളാണ്. യൂട്യൂബിലൂടെ പ്രശസ്തരാവുകയും വരുമാനം നേടുന്ന പലരും നമുക്ക് ചുറ്റും തന്നെ ധാരാളമാണല്ലോ. സോഷ്യൽ മീഡിയ ഉപയോക്താക്കൾക്ക് സാദ്ധ്യതകളുടെ ഒരു വലിയ ലോകമാണ് തുറന്നിടുന്നത്.
സോഷ്യൽ മീഡിയ ദിനം
ലോകമെമ്പാടുമുള്ള ആശയവിനിമയങ്ങളിൽ സോഷ്യൽ മീഡിയ ചെലുത്തിയ സ്വാധീനം തിരിച്ചറിയുന്നതിനോടൊപ്പം ആഘോഷിക്കാൻ 2010 ജൂൺ 30 മുതലാണ് സോഷ്യൽ മീഡിയ ദിനം ആചരിക്കാൻ ആരംഭിച്ചത്. സോഷ്യൽ മീഡിയയെ ബഹുമാനിക്കാൻ ഒരു ദിവസം എന്ന നിലക്കാണ് മഷബിൾ ഈ ദിവസം ആചരിക്കുന്നത്. ലോകമെമ്പാടുമുള്ള വിനോദ, മൾട്ടി-പ്ലാറ്റ്ഫോം മീഡിയ ബിസിനസ്സാണ് മഷബിൾ.
സോഷ്യൽ മീഡിയ ദിനം എങ്ങനെ ആഘോഷിക്കാം?
ഈ സോഷ്യൽ മീഡിയ ദിവസം ഒരു ഹാഷ്ടാഗ് തയ്യറാക്കി, അല്ലെങ്കിൽ നിങ്ങളുടെ ഒരു അടിപൊളി ചിത്രം പോസ്റ്റ് ചെയ്ത് ആഘോഷിച്ചാലോ? എന്ത് പോസ്റ്റ് ചെയ്യുകയാണെങ്കിലും ഇന്നേവരെ സ്പെഷ്യൽ ആയി #socialmediaday എന്ന ഹാഷ്ടാഗ് ഉപയോഗിക്കാൻ മറക്കരുത്. സോഷ്യൽ മീഡിയ ദിനം ആഘോഷിക്കുന്നതിന് പുതിയ സോഷ്യൽ മീഡിയ ഉപയോഗിച്ചാലോ? ഉദാഹരണത്തിന് നിങ്ങൾ ഇൻസ്റ്റഗ്രാം ഉപഭോക്താവല്ലെങ്കിൽ ഇന്ന് ഒരു ഇൻസ്റ്റാഗ്രാം അകൗണ്ട് തുടങ്ങുക. ട്വിറ്റർ ഉപയോഗിക്കുന്നില്ലെങ്കിൽ ട്വിറ്റർ അക്കൗണ്ട് ഇന്ന് തന്നെ ആരംഭിക്കുക.
ഇനി മറ്റൊരു രീതിയിൽ കൂടെ സോഷ്യൽ മീഡിയ ദിനം ആഘോഷിക്കാം. നിങ്ങൾ സോഷ്യൽ മീഡിയയിൽ സജീവമായ വ്യക്തിയാണെങ്കിൽ ഇന്ന് പൂർണമായും സോഷ്യൽ മീഡിയയിൽ നിന്നും മാറി നിൽക്കുക. അത് പറ്റുമോ എന്നും നോക്കാമെന്നേ…
