ന്യൂഡൽഹി
രാജ്യത്ത് കോവിഡ് വാക്സിൻ സ്വീകരിച്ചവരുടെ എണ്ണം 31 കോടി കടന്നു. മൊത്തം 31, 50,45,926 വാക്സിൻ ഡോസ് കുത്തിവച്ചു. 24 മണിക്കൂറിൽ 61.19 ലക്ഷം പേർക്ക് വാക്സിൻ നൽകി. പ്രധാനമന്ത്രി നരേന്ദ്ര മോഡി ശനിയാഴ്ച കോവിഡ് പ്രതിരോധയജ്ഞത്തിന്റെ പുരോഗതി വിലയിരുത്തി. സംസ്ഥാനങ്ങൾക്കും കേന്ദ്രഭരണപ്രദേശങ്ങൾക്കും മൂന്ന് ദിവസത്തിനുള്ളിൽ 19 ലക്ഷം ഡോസുകൂടി കൈമാറുമെന്ന് കേന്ദ്രസർക്കാർ പറഞ്ഞു.
പരിശോധന 40 കോടി
രാജ്യത്ത് കോവിഡ് പരിശോധന 40 കോടി കടന്നതായി ഐസിഎംആർ അറിയിച്ചു. ജൂൺ ഒന്നുവരെ 35 കോടി പരിശോധന നടത്തിയിരുന്നു. ജൂണിൽ ദിവസം ശരാശരി 18 ലക്ഷം പരിശോധന നടത്തിയാണ് 40 കോടി പരിശോധനയെന്ന നാഴികക്കല്ല് പിന്നിട്ടതെന്ന് ഐസിഎംആർ വിശദീകരിച്ചു.
48,698 രോഗികൾ
രാജ്യത്ത് 24 മണിക്കൂറിൽ 48,698 കോവിഡ് കേസ് റിപ്പോർട്ട് ചെയ്തു. 24 മണിക്കൂറിൽ 64,818 പേർ രോഗമുക്തരായി. തുടർച്ചയായ 44–-ാം ദിവസവും പുതിയ രോഗബാധിതരേക്കാൾ കൂടുതൽ പേർ രോഗമുക്തരായി. ചികിത്സയിലുള്ളവരുടെ എണ്ണം തുടർച്ചയായ 86–-ാം ദിവസവും ആറ് ലക്ഷത്തിൽ താഴെയായി. 24 മണിക്കൂറിൽ 1183 പേരാണ് മരിച്ചത്.
