ക്വട്ടേഷൻ സംഘവുമായി ബന്ധമുണ്ടെന്ന റിപ്പോർട്ടുകളെത്തുടർന്ന് , ആകാശ് തില്ലങ്കേരി എന്നിവരെ തള്ളി സിപിഎം രംഗത്തെത്തി. പാർട്ടിയെ മറയാക്കി അർജുൻ ക്വട്ടേഷൻ നടത്തുന്നുവെന്നാണ് ആരോപണം. ഇവർക്കെതിരെ പ്രാദേശികമായി പ്രചാരണം നടത്താൻ സിപിഎം തീരുമാനിച്ചു. ഏഷ്യാനെറ്റ് ന്യൂസ് റിപ്പോർട്ട് ചെയ്തു.
സിപിഎമ്മിന്റെ രാഷ്ട്രീയ പ്രചാരവേല സോഷ്യൽ മീഡിയ വഴി നടത്താൻ ഒരു ക്വട്ടേഷൻ സംഘത്തേയും ഏൽപ്പിച്ചിട്ടില്ലെന്ന് സിപിഎം കണ്ണൂർ ജില്ലാ സെക്രട്ടറി എംവി ജയരാജൻ പറഞ്ഞു. ക്വട്ടേഷൻ സംഘത്തിൽ പെട്ട ആരെങ്കിലും ഉണ്ടെങ്കിൽ അവരെ തള്ളിപ്പറയുന്നതായും അദ്ദേഹം പറഞ്ഞു. നവമാധ്യമ മേഖലയിൽ അവരെ ചുമതലപ്പെടുത്തില്ലെന്നും അദ്ദേഹം വ്യക്തമാക്കി.
അർജ്ജുൻ ആയങ്കിയുടെ വീട്ടിൽ കഴിഞ്ഞ ദിവസം കസ്റ്റംസ് പരിശോധന നടത്തിയിരുന്നു. സംഭവത്തിനു പിന്നാലെ ഒഴിവിൽ പോയ അർജുനെ കണ്ടെത്താൻ കസ്റ്റംസിന് കഴിഞ്ഞിട്ടില്ല. കണ്ണൂർ വിമാനത്താവളം വഴിയുള്ള സ്വർണ്ണക്കടത്തിന് അർജുൻ ഇടനിലക്കാരനായി പ്രവർത്തിച്ചിട്ടുണ്ടെന്നാണ് അന്വേഷണ സംഘത്തിന് ലഭിച്ച റിപ്പോർട്ട്.
രാമനാട്ടുകര സംഭവത്തിൽ പിടിയിലായ മൂർക്കനാട് സ്വദേശി മുഹമ്മദ് ഷഫീഖിൽ നിന്നാണ് സ്വർണ്ണക്കടത്തിൽ അർജുൻ ആയങ്കിയുടെ പങ്ക് സംബന്ധിച്ച മൊഴി ലഭിച്ചത്. ഷഫീഖിനെ അവസാനം വിളിച്ചത് അർജുനായിരുന്നു. ഷഫീഖ് പിടിയിലായ വിവരം ലഭിച്ചയുടൻ അർജുൻ ഒളിവിൽ പോകുകയായിരുന്നു.
