Also Read :
വിസ്മയയുടെ സ്വര്ണം സൂക്ഷിച്ചിരുന്ന ലോക്കറും പോലീസ് സീൽ ചെയ്തിട്ടുണ്ട്. അതിന് പുറമെ, സ്ത്രീധനമായി നൽകിയ കാറും സ്വര്ണവും തൊണ്ടിമുതലാവുമെന്നും പോലീസിനെ ഉദ്ധരിച്ച് മാതൃഭൂമി ഓൺലൈൻ റിപ്പോര്ട്ട് ചെയ്യുന്നു.
പ്രതിയായ കിരൺകുമാറിനെ കൂടുതൽ ദിവസം കസ്റ്റഡിയിൽ വിട്ടുകിട്ടാനുള്ള അപേക്ഷയും ഇന്ന് കോടതിയിൽ സമര്പ്പിക്കും. കേസിൽ കൂടുതൽ ചോദ്യം ചെയ്യലും തെളിവെടുപ്പ് ആവശ്യമുണ്ടെന്ന് ചൂണ്ടിക്കാട്ടിയാകും കസ്റ്റഡി അപേക്ഷ സമര്പ്പിക്കുക.
കേസിൽ വിസ്മയയുടെ സുഹൃത്തുക്കളിൽ നിന്നും മൊഴിയെടുക്കാനും പോലീസ് തീരുമാനിച്ചിട്ടുണ്ടെന്നും മാതൃഭൂമി റിപ്പോര്ട്ട് ചെയ്തു. നേരത്തേയും വിസ്മയയെ മര്ദ്ദിച്ചിരുന്നതായി ചില സുഹൃത്തുക്കള് മാധ്യമങ്ങളിലൂടെ വെളിപ്പെടുത്തിയിരുന്നു. തുടര്ന്നാണ് ഇവരെ ചോദ്യം ചെയ്യാൻ പദ്ധതി ഇട്ടത്.
അതേസമയം, ചടയമംഗലം പോലീസ് നേരത്തെ ഒത്തുതീര്പ്പാക്കിയ കിരൺകുമാറിന് എതിരെയുള്ള കേസ് പുനരന്വേഷിക്കണമെന്ന് ആവശ്യപ്പെട്ട് വിസ്മയയുടെ കുടുംബം വ്യാഴാഴ്ച രേഖാമൂലം പരാതി നൽകുമെന്നും അറിയിച്ചിട്ടുണ്ട്. കേസ് പുനരന്വേഷിക്കുമെന്ന് കഴിഞ്ഞ ദിവസം വിസ്മയയുടെ വീട്ടിലേക്ക് എത്തിയ ഐജി ഹര്ഷിത അത്തല്ലൂരി ഉറപ്പു നൽകിയിരുന്നു.
Also Read :
വിസ്മയയുടെ മരണം തൂങ്ങിമരണമാണെന്ന് സ്ഥിരീകരിച്ച പോലീസ് ആത്മഹത്യയാണോ കൊലപാതകമാണോ എന്നതിൽ വ്യക്തത വരുത്തിയിട്ടില്ല. കൊലപാതകമാണെങ്കിൽ പ്രതി കിരൺകുമാറിനെതിരെ കൂടുതൽ വകുപ്പുകള് ചുമത്തും. കിരണിന്ഫെ മാതാപിതാക്കളുടെ പങ്കിനെക്കുറിച്ചും പോലീസ് വിശദമായി അന്വേഷിക്കുമെന്നും റിപ്പോര്ട്ടുണ്ട്.
