തെഹ്റാൻ
ഇറാനിൽ ആണവനിലയത്തിന് നേരെയുണ്ടായ വിധ്വംസക ആക്രമണം അധികൃതർ പരാജയപ്പെടുത്തിയെന്ന് റിപ്പോർട്ട്. ബുധനാഴ്ചയുണ്ടായ ആക്രമണം കെട്ടിടത്തിന് കേടുപാടുണ്ടാകുംമുമ്പ് പ്രതിരോധിക്കാനായെന്ന് രാജ്യത്തെ വിവിധ വെബ്സൈറ്റുകളും പത്ര–- ദൃശ്യ മാധ്യമങ്ങളും റിപ്പോർട്ട് ചെയ്തു. അന്വേഷണം പുരോഗമിക്കുന്നതായും റിപ്പോർട്ടിൽ പറയുന്നു.
തെഹ്റാനിൽനിന്ന് 40 കിലോമീറ്റർ അകലെ കരാജ് നഗരത്തിലുള്ള നിലയമാണ് ആക്രമിക്കപ്പെട്ടത്. അടുത്തിടെയായി രാജ്യത്തെ വിവിധ ആണവ കേന്ദ്രങ്ങൾക്കുനേരെ ചെറുതും വലുതുമായ ആക്രമണങ്ങൾ ഉണ്ടാകുന്നുണ്ട്.
അതിനിടെ, മാസാദ്യം ഇറാൻ നടത്തിയ ഉപഗ്രഹ വിക്ഷേപണശ്രമം പരാജയപ്പെട്ടെന്ന വിവരവും പുറത്തുവന്നു. സെംനാൻ പ്രവിശ്യയിലെ ഇമാം ഖൊമെയ്നി സ്പേസ്പോർട്ടിൽനിന്ന് നടത്തിയ വിക്ഷേപണശ്രമമാണ് പരാജയപ്പെട്ടത്. വീണ്ടും വിക്ഷേപിക്കാൻ ശ്രമം ആരംഭിച്ചതായും റിപ്പോർട്ടുണ്ട്.
