തൃശൂർ: ആറ്റൂര്‍ വാഴക്കോടുള്ള കരിങ്കല്‍ ക്വാറിയിലുണ്ടായ സ്‌ഫോടനത്തില്‍ ഒരാള്‍ മരിച്ചു. വാഴക്കോട് വളവ് മൂലയില്‍ ഹസനാരുടെ മകനും പാറമട ഉടമയുടെ സഹോദരനുമായ അബ്ദുള്‍ നൗഷാദ് (45) ആണ് മരിച്ചത്. അഞ്ചു പേര്‍ക്ക് പരിക്കേറ്റിട്ടുണ്ട്. ഒരാളുടെ നില ഗുരുതരമാണ്. കോലോത്തുകുളം അലിക്കുഞ്ഞ് എന്നയാളാണ് ഗുരുതരാവസ്ഥയിലുള്ളത്. പാറമടയിലെ തൊഴിലാളികളായ ഉമ്മര്‍, അസീസ് അബൂബക്കര്‍, രണ്ട് അന്യസംസ്ഥാന തൊഴിലാളികള്‍ എന്നിവരാണ് പരിക്കേറ്റ മറ്റുപേര്‍.
രാത്രി ഏഴേമുക്കാലോടെയാണ് അപകടം. പാറ പൊട്ടിക്കാന്‍ ഉപയോഗിക്കുന്ന തോട്ടകള്‍ പൊട്ടിത്തെറിച്ചാണ് അപകടമെന്നാണ് പ്രാഥമിക നിഗമനം. സ്‌ഫോടനത്തില്‍ സമീപത്തെ നിരവധി വീടുകള്‍ക്കും കേടുപാടുകള്‍ സംഭവിച്ചിട്ടുണ്ട്. പ്രദേശത്ത് കിലോമീറ്ററുകളോളം വന്‍ശബ്ദത്തില്‍ പ്രകമ്പനം ഉണ്ടായി. ആറ്റൂര്‍, പെട്ടിക്കാട്ടിരി, ചീക്കം, താഴപ്ര, ഉദുവടി പ്രദേശങ്ങളിലാണ് ഭൂമികുലുക്കംപോലെ അനുഭവം ഉണ്ടായത്.
മുള്ളൂര്‍ക്കര മുന്‍ പഞ്ചായത്ത് പ്രസിഡന്റ് അബ്ദുള്‍ സലാമിന്റെ ഉടമസ്ഥതയി ലുള്ളതാണ് പാറമട. ആറുമാസം മുൻപു വരെ പ്രവർത്തിച്ചിരുന്ന പാറമടക്കതിരെ ജനങ്ങൾ പ്രതിഷേധം ഉയർത്തിയിരുന്നു. ആറുമാസം മുൻപ് പാറമടയുടെ പ്രവർത്തനം അധികൃതർ ഇടപ്പെട്ട് നിർത്തിവെയ്പ്പിച്ചിരുന്നുവെന്നും പറയുന്നു. പരിക്കേറ്റവരെ തൃശൂരിലെ വിവിധ ആശുപത്രികളില്‍ പ്രവേശിപ്പിച്ചിരിക്കുകയാണ്.
