കെ സുധാകരനും പിണറായി വിജയനും തമ്മിലുള്ള വാക്പോര് തുടങ്ങിയത് പിണറായി വിജയനാണ്. അത് അവസാനിപ്പിക്കാനുള്ള ബാധ്യത പിണറായി വിജയനുണ്ടെന്നും ചെന്നിത്തല പറഞ്ഞു. സുധാകരൻ വന്നതോടെ മുഖ്യമന്ത്രിക്ക് ഹാലിളകി. വിവാദം മുന്നോട്ടു കൊണ്ടു പോകാൻ ആഗ്രഹിക്കുന്ന വ്യക്തിയല്ല സുധാകരനെന്നും ചെന്നിത്തല അവകാശപ്പെട്ടു.
സുധാകരനെ ശത്രുവായി കണ്ട് ആക്രമിക്കാൻ പിണറായി ശ്രമിക്കുകയാണ്. നേതാക്കൾ വ്യക്തിപരമായ ആക്ഷേപം നടത്തുന്നതിനെ അംഗീകരിക്കുന്ന ആളല്ല താനെന്നും ചെന്നിത്തല പറഞ്ഞു. രാഷ്ട്രീയ പ്രതിയോഗികളെ ആക്രമിക്കാൻ മുഖ്യമന്ത്രി വാർത്താ സമ്മേളനം ഉപയോഗിക്കുകയാണ്. കൊവിഡ് അവലോകന യോഗത്തിന് ശേഷം വിളിച്ചു ചേർക്കുന്ന വാർത്താ സമ്മേളനം അതിനായി ഉപയോഗിക്കുകയാണെന്നും ചെന്നിത്തല ആരോപിച്ചു.
പിണറായി വിജയനെ ബ്രണ്ണൻ കോളേജ് പഠനകാലത്ത് ചവിട്ടി വീഴ്ത്തിയെന്ന കെ സുധാകരന്റെ അവകാശവാദത്തിനാണ് മുഖ്യമന്ത്രി മറുപടി പറഞ്ഞത്. മനോരമ ആഴ്ചപ്പതിപ്പിന് നൽകിയ അഭിമുഖത്തിലാണ് സുധാകരൻ അവകാശവാദം ഉന്നയിച്ചത്.
