ബ്രണ്ണൻ കോളേജിൽ പഠിക്കുന്ന കാലത്ത് കെഎസ്എഫ് പ്രവര്‍ത്തകനായിരുന്ന പിണറായി വിജയനെ ചവിട്ടി വീഴ്ത്തിയെന്നായിരുന്നു കെ സുധാകരൻ കഴിഞ്ഞ ദിവസം പറഞ്ഞത്. എന്നാൽ ഇതു സംബന്ധിച്ച് മാധ്യമപ്രവര്‍ത്തകര്‍ വാര്‍ത്താസമ്മേളനത്തിൽ ചോദ്യമുന്നയിച്ചപ്പോള്‍ മുഖ്യമന്ത്രി ഇക്കാര്യം നിഷേധിച്ചു. കെ സുധാകരനു തന്നെ മര്‍ദ്ദിക്കണെന്ന് മോഹമുണ്ടായിരുന്നിരിക്കുമെന്നും എന്നാൽ അത് നടന്നിട്ടില്ലെന്നും മുഖ്യമന്ത്രി പറഞ്ഞു. മമ്പറം ദിവാകരൻ ഉള്‍പ്പെടെയുള്ള കോൺഗ്രസ് നേതാക്കളുടെ പഴയ പ്രതികരണങ്ങള്‍ ചൂണ്ടിക്കാണിച്ചു കൊണ്ട് കെ സുധാകരനെതിരെ മുഖ്യമന്ത്രി നിരവധി ആരോപണങ്ങളാണ് ഉന്നയിച്ചത്. ഇതിനു പിന്നാലെയാണ് മമ്പറം ദിവാകരൻ ഒരു വാര്‍ത്താ ചാനലിനോടു പ്രതികരിച്ചത്.
Also Read:
കെ സുധാകരൻ കുറച്ചു കൂടി പക്വത കാണിക്കണമെന്നും ഉത്തരവാദിത്തപ്പെട്ട കെപിസിസി അധ്യക്ഷൻ എന്ന നിലയിൽ ഇത്തരം കാര്യങ്ങളല്ല പറയേണ്ടതെന്നും മമ്പറം ദിവാകരൻ പറഞ്ഞു. മുഖ്യമന്ത്രിയ്ക്കെതിരെ ക്യാംപസ് കഥകളല്ല പറയേണ്ടത്. ഇത്തരം രാഷ്ട്രീയം കോൺഗ്രസിനു ചേരില്ല. ബ്രണ്ണൻ കോളേജിൽ പഠിച്ചിരുന്ന കാലത്ത് കെ സുധാകരൻ പിണറായി വിജയനെ മര്‍ദ്ദിച്ചതായി കേട്ടിട്ടില്ലെന്നും മമ്പറം ദിവാകരൻ ഏഷ്യാനെറ്റ് ന്യൂസിനോടു പറഞ്ഞു. 1964-65 കാലത്ത് ബ്രണ്ണൻ കോളേജിൽ നിരവധി രാഷ്ട്രീയ സംഘട്ടനങ്ങള്‍ നടന്നിട്ടുണ്ടെന്നും എന്നാൽ അത്തരമൊരു സംഭവം നടന്നതായി അറിവില്ല.
Also Read:
പിണറായി വിജയൻ്റെ മക്കളെ തട്ടിക്കൊണ്ടു പോകാൻ കെ സുധാകരൻ പദ്ധതിയിട്ടിരുന്നുവെന്ന ഒരു കോൺഗ്രസ് നേതാവിൻ്റെ ആരോപണത്തെപ്പറ്റി താൻ മുഖ്യമന്ത്രി ഇന്നലെ പറയുമ്പോള്‍ മാത്രമാണ് കേട്ടതെന്നും മമ്പറം പ്രതികരിച്ചു. കെപിസിസി അധ്യക്ഷൻ സമന്വയത്തിൻ്റെ പാതയാണ് സ്വീകരിക്കേണ്ടതെന്നും വെല്ലുവിളിയുടേതല്ലെന്നും അദ്ദേഹം കൂട്ടിച്ചേര്‍ത്തു. കെ സുധാകരൻ്റെ നടപടികളെപ്പറ്റി പാര്‍ട്ടിയിലെ ഉത്തരവാദിത്തപ്പെട്ടവരെ അറിയിച്ചിട്ടുണ്ടെന്നും അദ്ദേഹം പറഞ്ഞു.
