തിരുവനന്തപുരം: വനഭൂമിയിൽ മരംമുറി ഉണ്ടായിട്ടില്ലെന്നും തെറ്റായ നടപടി ഉണ്ടായെങ്കിൽ പരിശോധിക്കുമെന്നും റവന്യൂ മന്ത്രി കെ. രാജൻ. മരംമുറിക്ക് കാരണമായ ഉത്തരവിൽ തെറ്റില്ലെന്ന മുൻ നിലപാടും മന്ത്രി ആവർത്തിച്ചു.മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. ഏതെങ്കിലും ഒരു വില്ലേജ് ഓഫീസറുടെ നടപടിയാകാം മരംമുറിക്ക് പിന്നിൽ. ഉത്തരവിൽ വീഴ്ചയുണ്ടായെന്ന് ഒരു കത്തിലും പറയുന്നില്ലെന്നും റവന്യൂ മന്ത്രി വ്യക്തമാക്കി.
സർക്കാരിന്റെ മരങ്ങൾ മുറിച്ചുപോയിട്ടുണ്ടെങ്കിൽ അത് തെറ്റായ നടപടിയാണ്. അത് ഉത്തരവിന്റെ ഭാഗമല്ല. ഉത്തരവിനെ ദുർവ്യാഖ്യാനം ചെയ്തതാണ്. തെറ്റായ നടപടിക്ക് ആരെങ്കിലും കൂട്ടുനിന്നിട്ടുണ്ടെങ്കിൽ എല്ലാ കൃത്യതയോടെയും പരിശോധിക്കും. പരിശോധനയുടെ അടിസ്ഥാനത്തിൽ നടപടിയെടുക്കുകയും ചെയ്യും. സർക്കാരിന് ഇക്കാര്യത്തിൽ പേടിക്കാനില്ല.
സർക്കാരിന്റെ കൈകൾ വളരെ ശുദ്ധമാണ്.ഉത്തരവിൽ അപകടമില്ല. അത് ദുർവ്യാഖാനം ചെയ്തതാണ് പ്രശ്നങ്ങൾക്ക് കാരണം. ഒരു യാഥാർത്ഥ്യത്തെ ദുർവ്യാഖ്യാനം ചെയ്യുന്നത്, ഈ ഉത്തരവിൽ മാത്രമല്ല, ഏത് ഉത്തരവിലും എന്തിന്റെ അടിസ്ഥാനത്തിൽ ചെയ്തതാണെങ്കിലും അത് തെറ്റാണ്. തെറ്റ് ചെയ്താൽ ശിക്ഷിക്കപ്പെടും. ഒരാളെയും സംരക്ഷിക്കാൻ ശ്രമിക്കില്ല. ഉത്തരവിനെ തെറ്റിദ്ധരിപ്പിച്ച് അവതരിപ്പിച്ചത് ആരാണെങ്കിലും കർശനമായ നടപടിയുണ്ടാകും. പുതിയ എഫ്.ഐ.ആർ. കണ്ടിട്ടില്ല. സംഭവത്തിൽ പൊതു അന്വേഷണമാണ് നടക്കുന്നതെന്നും റവന്യൂ മന്ത്രി വ്യക്തമാക്കി.
Content Highlight: Muttil tree felling case, Revenue minister press meet
