കരുവാരക്കുണ്ട്: പുത്തനഴി കൊടക്കാടൻ ചോലയിൽ മൊബൈൽ നെറ്റ്വർക്കില്ലാത്തതിനെ തുടർന്ന്കൊടുംകാട്ടിൽ കുടയും ചൂടി പഠനം നടത്തുന്നത് നിരവധി കുട്ടികൾ.
മൊബൈൽ റേഞ്ചിന് പുറത്തായ സ്ഥലമായതിനാൽ സ്കൂൾ ഓൺലൈൻ ക്ലാസുകളിൽ വിദ്യാർത്ഥികൾക്ക് പങ്കെടുക്കാനാവുന്നില്ല. മഴക്കാലത്ത് മണിക്കൂറുകളോളം വൈദ്യുതി മുടങ്ങുന്നതിനാലും ടിവി ഭൂരിഭാഗം വീടുകളിൽ ഇല്ലാത്തത് കൊണ്ടും ക്ലാസുകളിൽ കൃത്യമായി ഇവിടങ്ങളിൽ ആർക്കും പങ്കെടുക്കാനാവുന്നില്ല.
എന്നാൽ കോളേജ് വിദ്യാർത്ഥികൾക്ക് ഫോൺ വഴിയുള്ള ഓൺലൈൻ ക്ലാസല്ലാതെ മറ്റൊരു മാർഗ്ഗവുമില്ല. ഒന്നിലധികം വിദ്യാർത്ഥികളുള്ള വീടുകളിൽ ഒരു സ്മാർട്ട് ഫോൺ മാത്രമുള്ളതും പ്രശ്നമാണ്. രാവിലെ സമസ്തയുടെ മദ്റസ ഓൺ ലൈൻ ക്ലാസുകളിലും കുട്ടികൾക്ക്പങ്കെടുക്കാനാവുന്നില്ല.
ഗ്രാമത്തിൽ മതിയായ ഇന്റർനെറ്റ് കണക്റ്റിവിറ്റി ഇല്ലാത്തതിനാൽ ദിവസവും കുന്നുകൾ കയറി പാറപ്പുറങ്ങളിൽ ഇരുന്നാണ് വിദ്യാർത്ഥികൾ അവരുടെ ഓൺലൈൻ ക്ലാസിൽ പങ്കെടുക്കുന്നത്. വിക്ടേഴ്സ് ചാനലിലെ ക്ലാസിന് പുറമേ ഓൺലൈനായും ലൈവായും ക്ലാസുകൾക്ക് തുടക്കം കുറിച്ച സഹചര്യത്തിൽ വിദ്യാർഥികളും രക്ഷിതാക്കളും വലിയ പ്രയാസത്തിലാണ്.
ഈ പ്രദേശങ്ങളിലുള്ള വിദ്യാർത്ഥികളും രക്ഷിതാക്കളും റെയ്ഞ്ച് കിട്ടുന്നതിനുവേണ്ടി സിം കാർഡുകൾ അങ്ങോട്ടുമിങ്ങോട്ടും മാറ്റി പല പരീക്ഷണം നടത്തിയെങ്കിലും എല്ലാം പരാജയപ്പെട്ടു. ഡിഗ്രി ക്ലാസുകളിലെ ചില വിഷയങ്ങൾ രാത്രികാലത്ത് നടക്കുമ്പോൾ രാത്രിയിലും കൊടുംകാട്ടിൽ കയറി ക്ലാസ് കേൾക്കേണ്ട അവസ്ഥയാണ്.
മാസാമാസമുള്ള ഇന്റർനെറ്റ് റീചാർജിംഗാണ് രക്ഷിതാക്കൾ നേരിടുന്ന മറ്റൊരു പ്രതിസന്ധി. മാസം 200 രൂപയിലധികം റീചാർജിംഗിനായി വേണ്ടിവരുന്നത് കൊവിഡ് സാഹചര്യത്തിൽ അധിക ബാധ്യതയാണ്. കുടുംബശ്രീ വഴി കെ.എസ്.എഫ്.ഇയുടെ സഹകരണത്തോടെ വിദ്യാർത്ഥികൾക്ക് ലാപ്ടോപ്പ് നൽകുന്ന കഴിഞ്ഞ സർക്കാരിന്റെ പദ്ധതിയും എങ്ങുമെത്തിയിട്ടില്ല.
Content Highlight: Lack of internet access kodakkadan chola
