തിരുവനന്തപുരം
ഒക്ടോബർ രണ്ടിനകം വില്ലേജ് ഓഫീസുകളിലെ മുഴുവൻ സേവനവും ഓൺലൈനായി ലഭ്യമാക്കുമെന്ന് മുഖ്യമന്ത്രി പിണറായി വിജയൻ. അഞ്ചു വർഷത്തിനകം വില്ലേജ് ഓഫീസുകൾ പൂർണമായും സ്മാർട്ടാക്കും. വില്ലേജ് ഓഫീസർമാരുമായി വീഡിയോ കോൺഫറൻസ് വഴി സംസാരിക്കുകയായിരുന്നു മുഖ്യമന്ത്രി. ജനങ്ങൾ ഏറ്റവുമധികം ബന്ധപ്പെടുന്നതാണ് വില്ലേജ് ഓഫീസ്. 1666 വില്ലേജ് ഓഫീസിൽ 126 എണ്ണം സ്മാർട്ടായി. 342 ഓഫീസ് സ്മാർട്ട് ആക്കുന്ന പ്രവർത്തനം പുരോഗമിക്കുന്നു. ബാക്കിയുള്ളവയും ഈ സർക്കാരിന്റെ കാലത്ത് പൂർത്തിയാക്കും.
ജീവനക്കാരുടെ മനോഭാവത്തിലും ഗുണപരമായ മാറ്റം വേണം. കാലാനുസൃതമായി നടക്കേണ്ട പരിഷ്കരണങ്ങളുമായി പൊരുത്തപ്പെടണം. പെരുമാറ്റത്തിൽ സേവകരാണെന്ന ബോധം വേണം. ഫയലുകൾ മരിച്ച രേഖകളാകരുത്, തുടിക്കുന്ന ജീവിതങ്ങളാകണം. സിവിൽ സർവീസിലെ അഴിമതിയുടെ തോത് ഗണ്യമായി കുറച്ചു. അന്യായമായി പണം വസൂലാക്കൽ മാത്രമല്ല, ഒരേ സേവനത്തിന് ജനങ്ങളെ പലതവണ ഓഫീസിൽ വരുത്തുന്നതും കാരണമില്ലാതെ ജനങ്ങളെ വിളിച്ചുവരുത്തി ബുദ്ധിമുട്ടിക്കുന്നതും അഴിമതിയാണ്. ഫയലുകൾ സമയബന്ധിതമായി തീർപ്പാക്കാതെ സൂക്ഷിക്കുന്നതും അഴിമതിക്ക് അരങ്ങൊരുക്കലാണ്. ഇതനുവദിക്കില്ല.
അപേക്ഷയിൽ തീരുമാനമെടുക്കാതെ ചില ഏജന്റുമാരെ കാണേണ്ട നിലയുണ്ടായിരുന്നു. അത് അവസാനിപ്പിച്ചു. ഇക്കാര്യത്തിൽ കൃത്യമായ നിരീക്ഷണ സംവിധാനം ഏർപ്പെടുത്തും. എല്ലാ വില്ലേജ് ഓഫീസിലും നൂതന സാങ്കേതിക വിദ്യയായ ‘കോർസ്’ അധിഷ്ഠിതമായി സംയോജിത ഭൂരേഖാ പോർട്ടൽ ലഭ്യമാക്കും. റവന്യൂ, സർവേ, രജിസ്ട്രേഷൻ വകുപ്പുകളിലായി നൽകുന്ന സേവനങ്ങൾ ഇതോടെ ഒറ്റ പോർട്ടലിൽ ലഭ്യമാകുമെന്നും മുഖ്യമന്ത്രി പറഞ്ഞു. മന്ത്രി കെ രാജൻ, റവന്യൂ പ്രിൻസിപ്പൽ സെക്രട്ടറി ഡോ. എ ജയതിലക്, ലാൻഡ് റവന്യൂ കമീഷണർ കെ ബിജു എന്നിവരും പങ്കെടുത്തു.
