കൊച്ചി: പാറ്റൂർ കേസിൽ വിജിലൻസ് അന്വേഷണം ആവശ്യപ്പെട്ടുകൊണ്ടുള്ള മുൻ മുഖ്യമന്ത്രി വിഎസ് അച്യുതാനന്ദന്റെ അപ്പീൽ ഹൈക്കോടതി തള്ളി. തിരുവനന്തപുരം വിജിലൻസ് കോടതി ഉത്തരവ് ഹൈക്കോടതി ശരിവെച്ചു.
ഹർജിയിൽ മുൻമുഖ്യമന്ത്രി ഉമ്മൻ ചാണ്ടി, ചീഫ് സെക്രട്ടറിയായിരുന്ന ഇകെ ഭരത് ഭൂഷൻ എന്നിവർക്കെതിരെ അന്വേഷണം നടത്തണമെന്നായിരുന്നു വിഎസ് അച്യുതാനന്ദൻ ആവശ്യപ്പെട്ടത്.
പാറ്റൂർ കേസിലെ എഫ്ഐആർ ഹൈക്കോടതി നേരത്തെ റദ്ദാക്കിയിരുന്നു. ഈ സാഹചര്യത്തിലാണ് ഹൈക്കോടതി അപ്പീൽ തള്ളിയിരിക്കുന്നത്. റദ്ദാക്കിയ എഫ്ഐആറിൽ കൂടുതലൊന്നും വിഎസിന്റെ ഹർജിയിൽ പറയുന്നില്ലെന്ന് കോടതി വ്യക്തമാക്കി. വിഎസിന്റെ ഹർജി പരിഗണിച്ചാൽ ഒരേ കേസിൽ രണ്ട് എഫ്ഐആർ രജിസ്റ്റർ ചെയ്യുന്ന സാഹചര്യം ഉണ്ടാകുമെന്ന് കോടതി വ്യക്തമാക്കി.
