നിയമ വിധേയമായി ജനാധിപത്യ മാർഗ്ഗത്തിൽ രാഷ്ട്രീയ പ്രവർത്തനം നടത്തിക്കൊണ്ടിരിക്കുന്ന ഭാരതീയ ജനതാ പാർട്ടിയെ അവഹേളിച്ച് ജനമധ്യത്തിൽ ഒറ്റപ്പെടുത്തി നശിപ്പിക്കാനാണ് ഇതെല്ലാം ചെയ്തുകൊണ്ടിരിക്കുന്നതെന്നും കുമ്മനം ആരോപിച്ചു. കള്ളപ്പണത്തിന്റെ ഉറവിടം ചോദിക്കാൻ കോടിയേരി ബാലകൃഷ്ണന് ധാർമ്മികമായ അവകാശം ഉണ്ടോ? കോടിയേരിയുടെ മകൻ പച്ചക്കറി കച്ചവടവും മത്സ്യ വ്യാപാരവും നടത്തിയതിന്റെ പണമാണോ ഇപ്പോ പുറത്തു വന്നിരിക്കുന്നത്. കള്ളപ്പണത്തിന്റെ ഉറവിടം ചോദിച്ചപ്പോൾ ഉത്തരം നൽകാൻ സാധിക്കാതെ വന്നതുകൊണ്ടല്ലേ ഇപ്പോഴും ജാമ്യം കിട്ടാതെ ജയിലിൽ കഴിയുന്നതെന്നും കുമ്മനം ചോദിച്ചു.
ബിജെപിയുടെ സംസ്ഥാന പ്രസിഡന്റിനെ ഒറ്റതിരിഞ്ഞ് ആക്രമിച്ച് ബഹുജന മധ്യത്തിൽ പരിഹാസ പാത്രമാക്കി മാറ്റിയെടുക്കാൻ നടത്തുന്ന സിപിഎമ്മിന്റെയും കോൺഗ്രസിന്റെയും ശ്രമം വിലപ്പോകില്ലെന്നും കുമ്മനം പറഞ്ഞു.
അതേസമയം കള്ളപ്പണ കടത്തിലെ ഇടനിലക്കാരനും ആർഎസ്എസ് പ്രവർത്തകനുമായ ധർമ്മരാജനെ പരാതിക്കാരനായി മാത്രമാണോ ബിജെപി കാണുന്നതെന്ന ചോദ്യത്തിന് വ്യക്തമായ ഉത്തരം നൽകാൻ കുമ്മനം തയ്യാറായില്ല. ബിജെപിയെ നശിപ്പിക്കാൻ പക്ഷപാതപരമായി പോലീസ് പ്രവർത്തിക്കുകയാണെന്നും കുമ്മനം ആരോപിച്ചു. കള്ളപ്പണ കടത്തുകാരനായ ധർമ്മരാജന്റെ ഫോൺ കേന്ദ്രീകരിച്ച് മാത്രം അന്വേഷണം നടത്തുന്നുവെന്നാണ് ബിജെപിയുടെ പരാതി.
