ആശുപത്രിയുടെ തീരുമാനത്തിനിടെതിരെ ഡൽഹിയിലെ വിവിധ സർക്കാർ ആശുപത്രികളിലെ മലയാളി നഴ്സുമാർ ആക്ഷൻ കൗൺസിൽ രൂപീകരിച്ച് സമൂഹമാധ്യമങ്ങളിലൂടെ പ്രതിഷേധം ആരംഭിച്ചു. ട്വിറ്ററിൽ ക്യാമ്പയ്ൻ ശക്തമാക്കാനും തീരുമാനിച്ചു.
ജോലിക്കിടെ നഴ്സുമാർ ഇംഗ്ലീഷിലോ ഹിന്ദിയിലോ മാത്രമേ സംസാരിക്കാൻ പാടുള്ളൂ എന്നും മലയാളം ഉപയോഗിക്കാൻ പാടില്ലെന്നുമാണ് നഴ്സിങ് സൂപ്രണ്ട് പുറത്തിറക്കിയ ഉത്തരവിൻ വ്യക്തമാക്കുന്നത്. നഴ്സുമാർ മലയാളം സംസാരിക്കുന്നത് രോഗികൾക്കും സഹപ്രവർത്തകർക്കും ബുദ്ധിമുട്ട് ഉണ്ടാക്കുന്നുവെന്ന പരാതി ലഭിച്ചതിനെ തുടർന്നാണ് നടപടിയെന്നാണ് ഉത്തരവിൽ വ്യക്തമാക്കുന്നുണ്ട്.
മലയാളി നഴ്സുമാരോട് സൂപ്രണ്ടിനുള്ള വിരോധമാണ് ഉത്തരവിന് കാരണമെന്ന് മലയാളി നഴ്സുമാർ വ്യക്തമാക്കിയതായി വിവിധ മാധ്യമങ്ങൾ റിപ്പോർട്ട് ചെയ്തു. പഞ്ചാബ്, ഹരിയാന, രാജസ്ഥാൻ, മിസോറാം എന്നീ സംസ്ഥാനങ്ങളിൽ നിന്നുള്ളവർ പ്രാദേശിക ഭാഷയാണ് സംസാരിക്കുന്നതെന്നും ഇവർ വ്യക്തമാക്കി.
ആശുപത്രി അധികൃതരുടെ തീരുമാനത്തിനെതിരെ കോൺഗ്രസ് നേതാക്കൾ രംഗത്തുവന്നു. ജോലിക്കിടെ മലയാളം സംസാരിക്കാൻ പടില്ലെന്ന് വ്യക്തമാക്കുന്ന സർക്കുലർ അത്ഭുതപ്പെടുത്തിയെന്ന് എഐസിസി ജനറൽ സെക്രട്ടറി കെ സി വേണുഗോപാൽ പറഞ്ഞു. മനുഷ്യാവകാശ ലംഘനത്തിനെതിരെ നടപടി സ്വീകരിക്കണമെന്ന് വ്യക്തമാക്കി. പ്രതിഷേധം ശക്തമായതോടെ ആശുപത്രി അധികൃതർ യോഗം വിളിച്ചിട്ടുണ്ട്.
