കൊച്ചി: കൊടകര കുഴൽപണ കവർച്ചാ കേസിൽ ഇഡി പ്രാഥമിക അന്വേഷണം തുടങ്ങി. പോലീസുമായി ചേർന്ന് പ്രവർത്തിക്കുമെന്ന് ഇഡി വ്യക്തമാക്കി, ട്വന്റിഫോർ ന്യൂസ് റിപ്പോർട്ട് ചെയ്തു.
പ്രാഥമിക അന്വേഷണം തുടങ്ങിയ ഇഡി പോലീസിൽ നിന്നും എഫ്ഐആർ ശേഖരിച്ചു. കേസിൽ വിദേശ ബന്ധം ഉണ്ടോയെന്ന് കണ്ടെത്താൻ സാധിച്ചിട്ടില്ലെന്നും ഇഡി വ്യക്തമാക്കി. കേസിൽ കൂടുതൽ തെളിവുകൾ ലഭിച്ചാൽ അപ്പോൾ ഇടപെടാം എന്നായിരുന്നു ഇഡിയുടെ മുൻ നിലപാട്.
കുഴൽപണ കേസിന്റെ ഉറവിടം കണ്ടെത്താൻ കേന്ദ്ര അന്വേഷണ ഏജൻസികൾ അന്വേഷിക്കണമെന്ന് ലോക് താന്ത്രിക് യുവ ജനതാദൾ നേതാവ് സലിം മടവൂർ ഹൈക്കോടതിയിൽ ഹർജി നൽകിയിരുന്നു. പത്ത് ദിവസത്തിനുള്ളിൽ നിലപാട് അറിയിക്കണമെന്ന് വെള്ളിയാഴ്ച ഹൈക്കോടതി ആവശ്യപ്പെട്ടു.
കള്ളപ്പണം വെളുപ്പിക്കൽ തടയൽ പ്രകാരം കേസെടുക്കണമെന്ന് ഇഡി ഡയറക്ടർക്കും ഡെപ്യൂട്ടി ഡയറക്ടർക്കും പരാതി നൽകിയിട്ടും നടപടിയുണ്ടായില്ലെന്ന് ഹർജിയിൽ പറയുന്നു.
