തിരുവനന്തപുരം
കുഴൽപ്പണക്കേസിൽ ബിജെപി സംസ്ഥാന പ്രസിഡന്റ് കെ സുരേന്ദ്രനും കേന്ദ്ര സഹമന്ത്രി വി മുരളീധരനും സ്ഥാനം രാജിവച്ച് അന്വേഷണം നേരിടണമെന്ന് സിപിഐ എം സംസ്ഥാന സെക്രട്ടറിയുടെ ചുമതലയുള്ള എ വിജയരാഘവൻ ആവശ്യപ്പെട്ടു. കുഴൽപ്പണം കടത്തിയ കേസിലും സി കെ ജാനുവിന്റെ പാർടിയെ ഒപ്പം നിർത്താൻ ലക്ഷങ്ങൾ കൈമാറിയത് സംബന്ധിച്ചും ഇതിനകം പുറത്തുവന്ന വിവരങ്ങൾ ബിജെപിയുടെ ജീർണത എത്രത്തോളമാണെന്നതിന് തെളിവാണ്. ഇത്രയും അധഃപതിച്ച രാഷ്ട്രീയ സംസ്കാരം പേറുന്ന പാർടി കേരളത്തിന്റെ ചരിത്രത്തിൽ ഉണ്ടായിട്ടില്ല.
കുഴൽപ്പണം കടത്തും രാഷ്ട്രീയ നേട്ടത്തിനുള്ള അവിഹിത പണമിടപാടും പാർടിയുടെ നേതൃത്വം അറിഞ്ഞുകൊണ്ട് നടത്തിയത് ഞെട്ടിപ്പിക്കുന്നതാണ്. കെ സുരേന്ദ്രനും വി മുരളീധരനും അറിഞ്ഞുകൊണ്ടാണ് ഇതെല്ലാം നടന്നത്. കള്ളപ്പണം ചുട്ടുചാമ്പലാക്കുമെന്ന് പ്രഖ്യാപിച്ച് അധികാരത്തിൽ വന്നവർ കള്ളപ്പണം ഒഴുക്കി തെരഞ്ഞെടുപ്പ് അട്ടിമറിക്കാണ് കളമൊരുക്കിയത്. ഈ സാഹചര്യത്തിൽ വി മുരളീധരന് കേന്ദ്രമന്ത്രിയായി തുടരാൻ അർഹതയില്ല.
വി മുരളീധരനുമായും സുരേന്ദ്രനുമായും അടുപ്പമുള്ളവർ മത്സരിച്ച മണ്ഡലങ്ങളിൽ കോടികളുടെ ഇടപാട് നടന്നു. ബിജെപിയെ പിന്തുണച്ച് ചില സമുദായ നേതാക്കൾ തെരഞ്ഞെടുപ്പിന് തൊട്ടുമുമ്പും വോട്ടെടുപ്പ് ദിനത്തിലും രംഗത്തുവന്നിരുന്നു. ബിജെപി നേതൃത്വത്തിൽനിന്ന് ഇവർ കോടികൾ കൈപ്പറ്റിയോയെന്ന സംശയവും ഉയർന്നിട്ടുണ്ടെന്നും വിജയരാഘവൻ പ്രസ്താവനയിൽ പറഞ്ഞു. അതേസമയം കള്ളപ്പണ, കുഴൽപണ ഇടപാടുകളിൽ കേന്ദ്ര അന്വേഷണ ഏജൻസികൾ നിശ്ശബ്ദരാണെന്ന് നേരത്തെ മാധ്യപ്രവർത്തകരുടെ ചോദ്യത്തിന് അദ്ദേഹം വെളിപ്പെടുത്തിയിരുന്നു. രാഷ്ട്രീയ താൽപ്പര്യം അനുസരിച്ചാണ് അവർ പ്രവർത്തിക്കുന്നത് എന്ന വസ്തുത കൂടുതൽ ബോധ്യപ്പെടുകയാണ്.
ഇതിൽ യുഡിഎഫും മൗനം പാലിക്കുകയാണ്. തെരഞ്ഞെടുപ്പിൽ യുഡിഎഫ് ബിജെപിയുമായുണ്ടാക്കിയ രാഷ്ട്രീയ ബാന്ധവത്തിനു പിന്നിൽ തെറ്റായ ഇടപാടുകളും ഉണ്ടാകാം. അതുകൊണ്ടാണ് മൗനം പാലിക്കുന്നതെന്നും അദ്ദേഹം പറഞ്ഞു.
