കൊച്ചി> ബ്യൂട്ടിപാര്ലര് വെടിവയ്പ് കേസ് പ്രതിയും രാജ്യാന്തര കുറ്റവാളിയുമായ രവി പൂജാരിയെ അന്വേഷണ സംഘം ബംഗളൂരുവില്നിന്ന് കൊച്ചിയിലെത്തിച്ചു. കൊച്ചി ബ്യൂട്ടി പാര്ലര് വെടിവെപ്പ് കേസുമായി ബന്ധപ്പെട്ട ചോദ്യംചെയ്യലിനാണ് രവി പൂജാരിയെ ക്രൈംബ്രാഞ്ച് കസ്റ്റഡിയില് വാങ്ങിയിരിക്കുന്നത്. കേസില് മൂന്നാം പ്രതിയാണ് രവി പൂജാരി.
ബുധനാഴ്ച വൈകിട്ടോടെ ബംഗളൂരു പരപ്പന അഗ്രഹാര ജയിലിലെത്തിയാണ് ക്രൈംബ്രാഞ്ച് സംഘം പൂജാരിയെ കസ്റ്റഡിയിലെടുത്തത്. തുടര്ന്ന് പൂജാരിയെ വന് സുരക്ഷാ സന്നാഹത്തോടെ ബംഗളൂരു വിമാനത്താവളത്തിലെത്തിച്ചു. ഇവിടെനിന്ന് രാത്രിയോടെ വിമാനമാര്ഗം കൊച്ചിയിലെത്തിക്കുകയായിരുന്നു.
നേരത്തെ മാര്ച്ചില് രവി പൂജാരിയെ കൊച്ചിയിലെത്തിക്കാന് ക്രൈംബ്രാഞ്ച് സംഘം ശ്രമിച്ചിരുന്നു. എന്നാല് മുംബൈ പോലീസ് പൂജാരിയെ നേരത്തെ കസ്റ്റഡിയില് വാങ്ങിയതോടെ അത് നടന്നില്ല.
