തിരുവനന്തപുരം > കൂടുതൽ വ്യവസായങ്ങളെ ആകർഷിക്കാനും നിലവിലുള്ളവയുടെ വികസനത്തിനും കൂടുതൽ തൊഴിൽ സൃഷ്ടിക്കാനും സമഗ്ര കർമപദ്ധതി നടപ്പാക്കുമെന്ന് വ്യവസായ മന്ത്രി പി രാജീവ്. വ്യവസായികളുമായി ഓൺലൈനിൽ സംവദിക്കുകയായിരുന്നു അദ്ദേഹം.
നൂറുദിനം, ഒരു വർഷം, അഞ്ചു വർഷം എന്നിങ്ങനെ കാലപരിധി നിശ്ചയിച്ച് പദ്ധതികൾ നടപ്പാക്കും. ബജറ്റിലെയും പ്രകടനപത്രികയിലെയും പ്രഖ്യാപനങ്ങളെ അടിസ്ഥാനമാക്കിയാകും കർമപദ്ധതി തയ്യാറാക്കുക.
മെഡിക്കൽ ഉപകരണങ്ങൾ, ഇലക്ട്രോണിക്സ്, ഭക്ഷ്യ സംസ്കരണ വ്യവസായ മേഖലകൾക്ക് ഊന്നൽ നൽകും. എംഎസ്എംഇ മേഖലയിൽ മൂന്നു ലക്ഷം യൂണിറ്റ് തുടങ്ങാനും ആറു ലക്ഷം തൊഴിൽ സൃഷ്ടിക്കാനുമാണ് ലക്ഷ്യമിടുന്നത്. വ്യവസായങ്ങളും ഉന്നത വിദ്യാഭ്യാസ സ്ഥാപനങ്ങളും തമ്മിലുള്ള സഹകരണം ശക്തിപ്പെടുത്തും. കേരളത്തിൽ ട്രേഡ് സെന്റർ യാഥാർഥ്യമാക്കും.
പ്രാദേശിക വ്യവസായ ക്ലസ്റ്ററുകൾ സ്ഥാപിക്കാൻ രൂപരേഖ തയ്യാറാക്കും. വ്യവസായങ്ങൾക്കുള്ള ഏകജാലക സംവിധാനം ശക്തിപ്പെടുത്തും. വിജയകരമായ വ്യവസായങ്ങളെക്കുറിച്ച് പഠനം നടത്തി വിജയവഴികൾ പുതിയ വ്യവസായികളെ പരിചയപ്പെടുത്തും. നിക്ഷേപകർക്ക് ആവശ്യമായ എല്ലാ സഹായവും നൽകുന്ന കേന്ദ്രങ്ങളായി ജില്ലാ വ്യവസായ കേന്ദ്രങ്ങളെ മാറ്റും. തോട്ടംമേഖലയെ വ്യവസായമായാണ് സർക്കാർ കാണുന്നത്. പ്ലാന്റേഷൻ ഡയറക്ടറേറ്റ് രൂപീകരിക്കും.
വ്യവസായ വകുപ്പിന്റെ പ്രവർത്തനം സുതാര്യമായിരിക്കും. പ്രശ്നങ്ങൾ പരിശോധിക്കാനും പരിഹരിക്കാനുമായി പ്രത്യേക സംവിധാനം ഒരുക്കും. വ്യവസായ, നിയമ, തദ്ദേശ വകുപ്പുകളുടെ സെക്രട്ടറിമാർ ഉൾപ്പെട്ട സമിതി ഇതിനായി രൂപീകരിച്ചതായും മന്ത്രി അറിയിച്ചു.
വ്യവസായ സെക്രട്ടറി ഡോ. ഇ ഇളങ്കോവൻ, കെഎസ്ഐഡിസി എംഡി എം ജി രാജമാണിക്യം, വനിതാ–- യുവ സംരംഭകർ ഉൾപ്പെടെ 80 വ്യവസായികൾ, സിഐഐ, ഫിക്കി, ടിഐഇ, ചെറുകിട വ്യവസായ അസോസിയേഷൻ പ്രതിനിധികൾ എന്നിവരും ഓൺലൈൻ യോഗത്തിൽ പങ്കെടുത്തു.
