കേസിൽ ബിജെപി നേതാക്കളെ ചോദ്യം ചെയ്യുന്നത് തുടരുകയാണ്. ബിജെപി തൃശൂർ ജില്ലാ കമ്മിറ്റിയാണ് കുഴൽപണ കടത്തുകാർക്ക് ഹോട്ടൽ മുറിയെടുത്ത് നൽകിയതെന്ന് പോലീസിന് മൊഴി ലഭിച്ചിരുന്നു. ഓഫീസ് സെക്രട്ടറി സതീഷിൽ നിന്നാണ് പോലീസിന് നിർണ്ണായക വിവരം ലഭിച്ചത്. ഇതിന്റെ അടിസ്ഥാനത്തിലാണ് അനീഷ് കുമാറിനെ ചോദ്യം ചെയ്യുക.
ബിജെപിക്കുവേണ്ടിയല്ല പണം കൊണ്ടുവന്നത് എന്നാണ് നേതൃത്വം വിശദീകരിക്കുന്നത്. എന്നാൽ അതോടൊപ്പം ബിജെപി നേതാക്കൾ എന്തിനാണ് പ്രതികൾക്ക് സൗകര്യം ചെയ്തു കൊടുത്തത് എന്ന ചോദ്യവും ഉയരുന്നുണ്ട്.
അതേസമയം, വധഭീഷണിയുണ്ടെന്ന ഒബിസി മോർച്ച മുൻ വൈസ് പ്രസിഡന്റ് ഋഷി പൽപ്പുവിന്റെ പരാതിയുടെ അടിസ്ഥാനത്തിൽ ബിജെപി തൃശൂർ ജില്ലാ ജനറൽ സെക്രട്ടറി കെ ആർ ഹരിക്കെതിരെ കേസെടുത്തു.
ബിജെപി ജില്ലാ കമ്മിറ്റി പിരിച്ചുവിടണമെന്ന് ഋഷി പൽപ്പു ഫേസ്ബുക്കിലൂടെ ആവശ്യപ്പെട്ടിരുന്നു. ഇതിനു പിന്നാലെയാണ് കെ ആർ ഹരി ഭീഷണിപ്പെടുത്തിയതെന്ന് പരാതിയിൽ പറയുന്നു. എന്നാൽ പാർട്ടിയിൽ നിന്നും പുറത്താക്കിയതിന്റെ പ്രതികാരമാണ് പരാതിക്കു പിന്നിലെന്ന് ബിജെപി ജില്ലാ നേതൃത്വം ആരോപിക്കുന്നു.
