കൊവിഡിന്‍റെയും പ്രളയത്തിന്‍റെയും സാഹചര്യത്തില്‍ സര്‍ക്കാര്‍ മുന്നില്‍ ഉണ്ടായിരുന്നു എന്ന പ്രതീതി ഉണ്ടാക്കാന്‍ ഭരണപക്ഷത്തിന് കഴിഞ്ഞെന്ന് ചെന്നിത്തല പറഞ്ഞു. പെന്‍ഷനും കിറ്റും എല്ലാം അവരെ അധികാരത്തിലെത്താന്‍ സഹായിച്ചു. എന്നാല്‍ കൊവിഡ് മൂലം സർക്കാരിന് എതിരായ കാര്യങ്ങൾ ജനങ്ങളിലേക്ക് എത്തിക്കാൻ ആയില്ലെന്നും അദ്ദേഹം പറഞ്ഞു.
പരാജയത്തിന്‍റെ ഉത്തരവാദിത്വം താന്‍ ഏറ്റെടുക്കുന്നെന്ന് ചെന്നിത്തല പറഞ്ഞതായാണ് റിപ്പോർട്ടുകൾ. പ്രതിപക്ഷ നേതാവ് എന്ന നിലയില്‍ മികച്ച പ്രവര്‍ത്തനം കാഴ്ചവെക്കാന്‍ സാധിച്ചിട്ടുണ്ട്. സർക്കാരിന്‍റെ അഴിമതികൾ തനിക്കു തുറന്ന് കാട്ടാൻ കഴിഞ്ഞു. അതിന് മാധ്യമങ്ങൾ വൻ പ്രാധാന്യം നൽകി. എന്നാൽ സംഘടനാ ദൗർബല്യം മൂലം അത് താഴെ തലത്തിലേക്കു എത്തിക്കാൻ ആയില്ലെന്നും അദ്ദേഹം പറഞ്ഞു.
സംഘടനാ തലത്തിലെ പിഴവുകളാണ് തിരിച്ചടിക്ക് പിന്നിലെന്നും ചെന്നിത്തല പറഞ്ഞു. പല ബൂത്തുകളും നിര്‍ജീവമായാണ് പ്രവര്‍ത്തിച്ചത്. ഇതെല്ലാം ഭരണകക്ഷിക്ക് അനകൂലമായി മാറി. സ്ലിപ് പോലും വീടുകളിൽ എത്തിക്കാൻ ആയില്ലെന്നും അദ്ദേഹം സമിതിക്ക് മുമ്പാകെ പറഞ്ഞു. തെരഞ്ഞെടുപ്പ് തോൽവിയിൽ ജില്ലാ ഘടകങ്ങൾക്കെതിരെ കേരളത്തിന്‍റെ ചുമതലയുള്ള താരിഖ് അൻവർ എഐസിസിക്ക് നൽകിയ റിപ്പോർട്ടിൽ പരാമർശിച്ചിരുന്നു.
അശോക് ചവാൻ കമ്മിറ്റിയുടെ റിപ്പോർട്ടിന്‍റെ കൂടി അടിസ്ഥാനത്തിലാകും സംഘടനാ തലത്തിലെ അഴിച്ചുപണികളിലേക്ക് പാർട്ടി കടക്കുക. ഡിസിസി പുനസംഘടന ഉൾപ്പെടെയുള്ള കാര്യങ്ങൾ ഇതിന് പിന്നാലെ ഉണ്ടായേക്കും.
