മോഹൻലാലിൻ്റെ നേതൃത്വത്തിലുള്ള വിശ്വശാന്തി ഫൗണ്ടേഷനാണ് സംസ്ഥാനത്തെ വിവിധ ആശുപത്രികൾക്ക് ആവശ്യമായ ഓക്‌സിജന്‍ കിടക്കകള്‍ അടക്കമുള്ള മെഡിക്കൽ ഉപകരണങ്ങൾ സംഭാവന ചെയ്‌തത്. ഇതിന് പിന്നാലെയാണ് മന്ത്രിയുടെ ഭാഗത്ത് നിന്നും പ്രതികരണം ഉണ്ടായത്.
പിറന്നാള്‍ ദിനത്തില്‍ കൊവിഡ് പ്രതിരോധത്തിന് കേരളത്തിലെ ആശുപത്രികളിലേക്ക് മെഡിക്കല്‍ ഉപകരണങ്ങള്‍ നല്‍കിയ മലയാളത്തിൻ്റെ പ്രിയ നടന്‍ മോഹന്‍ലാലിന് ഹൃദയം നിറഞ്ഞ നന്ദി പറയുന്നു. മഹാമാരിയെ നേരിടുന്ന ഘട്ടത്തില്‍ ഒന്നരക്കോടി രൂപയുടെ മെഡിക്കല്‍ ഉപകരണങ്ങളാണ് അദ്ദേഹം കൈമാറിയതെന്നും മന്ത്രി വ്യക്തമാക്കി.
ഓക്‌സിജന്‍ കിടക്കകള്‍, വെൻ്റിലേറ്റര്‍, ഐ സി യു കിടക്കകള്‍, എക്‌സ-റേ മെഷീനുകള്‍ എന്നിവയുള്‍പ്പെടെയാണ് ലഭിച്ചത്. കളമശേരി മെഡിക്കല്‍ കോളേജിലെ വാര്‍ഡുകളിലേക്ക് ആവശ്യമായ ഓക്‌സിജന്‍ പൈപ്പ് ലൈന്‍ സ്ഥാപിക്കുന്നതിനുള്ള സഹായവും മോഹൻലാൻ്റെ ഭാഗത്ത് നിന്നുമുണ്ടായി.
ഇന്ന് രാവിലെ ഫോണില്‍ വിളിച്ച് ആരോഗ്യമന്ത്രിയുടെ ഉത്തരവാദിത്വം ഏറ്റെടുത്തതിൽ മോഹൻലാൽ ആശംസകൾ അറിയിച്ചു. കൊവിഡ് പ്രതിരോധത്തിന് ഉൾപ്പടെ എല്ലാ പിന്തുണയും അദ്ദേഹം വാഗ്ദാനം ചെയ്‌തിട്ടുണ്ടെന്നും ആരോഗ്യ മന്ത്രി വീണാ ജോർജ് ഫേസ്‌ബുക്ക് പോസ്‌റ്റിലൂടെ പറഞ്ഞു.
