തിരുവനന്തപുരം: എസ്എസ്എൽസി പ്രാക്ടിക്കൽ പരീക്ഷകൾ ഒഴിവാക്കുമെന്ന് മുഖ്യമന്ത്രി പിണറായി വിജയൻ. ഹയർ സെക്കന്ററി, വൊക്കോഷണൽ ഹയർസെക്കന്ററി പ്രാക്ടിക്കൽ പരീക്ഷകൾ ജൂൺ 21 മുതൽ ജൂലൈ ഏഴ് വരെ നടത്തുമെന്നും മുഖ്യമന്ത്രി വാർത്താ സമ്മേളനത്തിൽ പറഞ്ഞു.
ഹയർ സെക്കന്ററി, വൊക്കേഷണൽ ഹയർ സെക്കന്ററി മൂല്യനിർണ്ണയം ജൂൺ ഒന്ന് മുതൽ 19 വരെയും എസ്എസ്എൽസി മൂല്യനിർണ്ണയം ജൂൺ എഴ് മുതൽ 25 വരെയും നടത്തുമെന്നും മുഖ്യമന്ത്രി വ്യക്തമാക്കി.
മൂല്യനിർണ്ണയത്തിന് പോകുന്ന അധ്യാപകർക്ക് വാക്സിൻ നൽകും. മൂല്യനിർണ്ണയത്തിന് മുമ്പ് വാക്സിനേഷൻ പൂർത്തിയാക്കുമെന്നും മുഖ്യമന്ത്രി വ്യക്തമാക്കി. ആരോഗ്യ വകുപ്പും വിദ്യാഭ്യാസ വകുപ്പും ഇതുമായി ബന്ധപ്പെട്ട് ചർച്ച നടത്തുമെന്നും മുഖ്യമന്ത്രി പറഞ്ഞു.
അതേസമയം കൊവിഡ് രണ്ടാം ഘട്ടത്തിന്റെ ഉച്ചസ്ഥായി പിന്നിട്ടെന്നും മൂന്നാം തരംഗത്തിന് സാധ്യതയുണ്ടെന്നും ജാഗ്രത കൈവിടരുതെന്നും മുഖ്യമന്ത്രി പറഞ്ഞു. വാക്സിനെ അതിജീവിക്കാൻ കഴിയുന്ന വൈറസാണ് മൂന്നാം തരംഗത്തിൽ വ്യാപിച്ചേക്കുക. ആശുപത്രികളെ സംബന്ധിച്ച് നിർണ്ണായകമായ സമയമാണിതെന്നും മുഖ്യമന്ത്രി പറഞ്ഞു.
