Also Read :
ഒന്‍പത് ദിവസമായി സ്വപ്നാ സുരേഷ് ക്രൈംബ്രാഞ്ച് കസ്റ്റഡിയിലാണ് ഉള്ളത്. വ്യാജ പരാതി ചമച്ച കേസിലാണ് ഇപ്പോള്‍ ചോദ്യം ചെയ്യൽ നടക്കുന്നത്.
എയര്‍ ഇന്ത്യ ഉദ്യോഗസ്ഥൻ എൽ എസ് സിബുവിനെതിരെ വ്യാജ പരാതി ചമച്ച കേസിലാണ് സ്വപ്ന ഈ മാസം 14 മുതൽ ക്രൈംബ്രാഞ്ച് കസ്റ്റഡിയിലാണ്. കസ്റ്റംസ് കേസിൽ കോഫെ പോസ പ്രതിയായി വനിതാ ജയിലിലായിരുന്നു സ്വപ്ന.
ഈ മാസം 14ന് ജയിലിൽ നിന്നും നേരെ കൊവിഡ് പരിശോധിച്ച ശേഷം കവടിയാറിലെ ജവഹര്‍ നഗറിലെ ക്രൈംബ്രാഞ്ച് ഓഫീസിലേക്ക് കൊണ്ടുപോകുകയായിരുന്നു. ശീതീകരിച്ച മുറിയിൽ കിടക്കാൻ കട്ടിലും മറ്റ് സൗകര്യങ്ങളും മൂന്ന് നേരവും ഹോട്ടലിൽ നിന്നുള്ള ഭക്ഷണവുമാണ് ഏര്‍പ്പെടുത്തിയിരിക്കുന്നത്.
അവിടെയും തീര്‍ന്നിട്ടില്ല, ക്രൈംബ്രാഞ്ച് ആസ്ഥാനത്ത് എസി കോൺഫറൻസ് ഹാളും ഈഞ്ചയ്ക്കലിലെ ക്രൈംബ്രാഞ്ച് മ്യൂസിയത്തിൽ എസി മുറിയും ചോദ്യം ചെയ്യലിന് തയാറാക്കിയിരുന്നത്. ചോദ്യം ചെയ്യലിന് എത്തിച്ചതിന് ശേഷം ജവഹര്‍ നഗറിലെ ഓഫീസിൽ നിന്നും രണ്ട് വട്ടം മാത്രമാണ് പുറത്തേക്ക് കൊണ്ടുപോയത്. വ്യാജ പരാതി ചമച്ച കംപ്യൂട്ടര്‍ എയര്‍ ഇന്ത്യ സാറ്റ് ഓഫീസിൽ നിന്നും കണ്ടുകെട്ടുന്നതിനും രക്തസമ്മര്‍ദ്ദം കുറഞ്ഞപ്പോള്‍ ഡോക്ടറെ കാണിക്കുന്നതിനുമാണ് പുറത്തേക്ക് പോയത്.
