വിഡി സതീശനോ, ചെന്നിത്തലയോ? പ്രതിപക്ഷ നേതാവിനെ ഇന്ന് പ്രഖ്യാപിച്ചേക്കും

തിരുവനന്തപുരം: പ്രതിപക്ഷ നേതാവിനെ കോൺഗ്രസ് നേതൃത്വം ഇന്ന് പ്രഖ്യാപിച്ചേക്കും. കഴിഞ്ഞ നിയമസഭയിൽ പ്രതിപക്ഷ നേതാവായിരുന്ന രമേശ് ചെന്നിത്തലയോ വിഡി സതീശനോ ആകും പ്രതിപക്ഷ നേതാവാകുക എന്നാണ് വിലയിരുത്തപ്പെടുന്നത്. ഉമ്മൻ ചാണ്ടിയുൾപ്പെടെയുള്ള ചില നേതാക്കൾ രമേശ് ചെന്നിത്തലയെ ആണ് പിന്തുണക്കുന്നതെങ്കിൽ കൂടുതൽ എംഎൽഎമാർ പ്രതിപക്ഷ നേതാവാകണമെന്ന നിലപാടിലാണെന്നാണ് ഏഷ്യാനെറ്റ് റിപ്പോർട്ട് ചെയ്യുന്നത്.

പുതിയ സർക്കാരിനെ നേരിടാൻ യുവ എംഎൽഎമാരുടെ പിന്തുണയുള്ള വിഡി സതീശനെ ഹൈക്കമാൻഡ് നിയോഗിക്കുമോയെന്നാണ് സംസ്ഥാന നേതൃത്വം ഉറ്റുനോക്കുന്നത്. യുവ എംഎൽഎമാർ ഗ്രൂപ്പിനതീതമായി വിഡി സതീശനെ പിന്തുണക്കുന്നുണ്ടെന്നാണ് പുറത്തുവരുന്ന റിപ്പോർട്ടുകൾ. എറണാകുളം ജില്ലയിൽ നിന്നുള്ള രണ്ട് ഐ ഗ്രൂപ്പ് എംഎൽഎമാർ മാത്രമാണ് സതീശനെതിരെ നിലപാട് സ്വീകരിച്ചതെന്ന് മാതൃഭൂമിയും റിപ്പോർട്ട് ചെയ്യുന്നു.

Also Read :

എ ഗ്രൂപ്പ് നേതൃത്വം ചെന്നിത്തല തന്നെ തുടരട്ടെയെന്ന നിലപാടാണ് സ്വീകരിക്കുന്നതെങ്കിലും ഗ്രൂപ്പിലെ മുഴുവൻ പേരും അതിനെ പിന്തുണയ്ക്കുന്നില്ല. എ വിഭാഗത്തിൽ നിന്നുള്ള എംഎൽഎമാരുടെ പിന്തുണയും സതീശന് ലഭിച്ചിട്ടുണ്ടെന്നാണ് റിപ്പോർട്ട്. പാർലമെന്‍ററി പാർട്ടിയിലെ ഭൂരിപക്ഷം നോക്കിയാണ് പ്രതിപക്ഷ നേതാവിനെ സ്വീകരിക്കുന്നതെങ്കിൽ ഇത്തവണ വിഡി സതീശൻ നേതാവാകുമെന്ന പ്രതീക്ഷയിലാണ് ഒരുവിഭാഗം നേതാക്കൾ.

എന്നാൽ ഹൈക്കമാൻഡിന്‍റെ തീരുമാനമാകും അവസാനവാക്ക് എന്നതിനാൽ പ്രഖ്യാപനം വരുന്നതുവരെ ഒരു പ്രവചനങ്ങൾക്കും സാധ്യതയില്ലെന്നും നേതാക്കൾക്ക് അറിയാം.

15-ാം കേരള നിയമസഭയുടെ ആദ്യ സമ്മേളനം ഈ മാസം 24,25 തീയ്യതികളിൽ വിളിച്ചുചേര്‍ക്കുന്നതിന് ഗവര്‍ണറോട് ശുപാര്‍ശ ചെയ്യാന്‍ മന്ത്രിസഭാ യോഗം തീരുമാനിച്ചിട്ടുണ്ട്. പ്രോടൈം സ്പീക്കറായി കുന്നമംഗലത്തുനിന്നുള്ള അഡ്വ. പി ടി എ റഹീമിനെ നിയോഗിക്കാനുള്ള ശുപാര്‍ശ നല്‍കാനും തീരുമാനിച്ചതായി മുഖ്യമന്ത്രി ഇന്നലെ അറിയിച്ചിരുന്നു.